«Ճկույթիկ» երգը կունենա շարունակություն. ՄԱՐԹԵՆ ՅՈՐԳԱՆՑ

 «Իրավունքը» զրուցել է ֆրանսահայ երգիչ, կոմպոզիտոր ՄԱՐԹԵՆ ՅՈՐԳԱՆՑԻ հետ:

— Պարոն Յորգանց, ի՞նչ նոր ստեղծագործական պրոցեսների մեջ եք:

— Նոյեմբերի 11-ին  Ֆրանսիայի Նից քաղաքում էի, որտեղ հայկական եկեղեցի ու դպրոց կա. այն մոտ 80-100 աշակերտ ունի: Տեղի հայկական դպրոցում սքանչելի երեկո էին կազմակերպել: Հայաստանից խումբ եկավ: Նվագեցին, փոքրիկները երգեցին, ես էլ նրանց հետ միասին երգեցի:

— Արցախի հայաթափման հետ կապված` ի՞նչ կասեք:

— Շատ տխուր իրավիճակ է: Մեր հողերն անցան թշնամուն: Խոսքով չեմ կարող ասել այն ցավը, որ հոգուս մեջ զգում եմ: Փառք Տիրոջը, որ գոնե 44-օրյա պատերազմի պես այդքան զոհեր չեղան, երիտասարդներ չկորցրինք: Իսկ դա շատ կարեւոր է: Չէ՞ որ երիտասարդները մեր ապագայի զինվորներն են: Նրանք պետք է պաշտպանեն մեր երկիրը:

— «Սեր եւ միություն» նախաբանով ամռանը եկաք Հայաստան՝ Դուք տեսա՞ք սեր եւ միություն:

— Ես ամեն անգամ, երբ  գալիս եմ Հայաստան, իմ համերգների ժամանակ սեր եւ միություն եմ քարոզում: Դա շատ կարեւոր է, որովհետեւ եթե սեր եւ միություն չունենանք, ոչինչ չենք կարող անել:

— Մեր փոքրիկներին ի՞նչ նոր անակնկալ ունեք մատուցելու:

— Մինչ Ձեզ հետ զրուցելը՝ փոքրիկների համար նոր երգի բառերն էի գրում: Նաեւ «Ճկույթիկ» երգի շարունակությունն եմ ուզում պատրաստել: Ինձ համար Հայաստանի փոքրիկները շատ կարեւոր են: Նրանք մեր վաղվա ապագան են:

— Ի՞նչ սպասելիքներ ունեք մեր երկրից, Հայաստանի ապագան ինչպե՞ս եք պատկերացնում:

— Իհարկե, ամենաառաջինը պետք է մեր հողերը պաշտպանենք, որպեսզի այսուհետեւ հողեր չկորցնենք: Մեր քաղաքական ուժերը պետք է միավորվեն, իրար հետ լավ աշխատեն, որպեսզի Հայաստանը լավ պաշտպանվի: Բանակը պետք  է ուժեղանա եւ հզորանա: Իսկ դա կլինի միայն այն ժամանակ, երբ սեր եւ միասնություն լինի մեր երկրում: Պետք է բոլորը միավորվեն, իրար սիրեն եւ հարգեն: Վստահ եմ, որ մեր մշակույթը շատ զորավոր է: Իսկ մենք մեր մշակույթով ուրիշ ժողովուրդներին պետք է պատմենք մեր խելքի եւ տաղանդի մասին:  Թեեւ ամբողջ աշխարհում Հայաստանին սիրում եւ հարգում են, բայց, դժբախտաբար, միայն սիրելով` չես կարող օգնել Հայաստանին: Հայաստանին օգնություն է պետք: Իսկ թե ինչպես պետք է Եվրոպան, Ամերիկան կամ Ռուսաստանը օգնեն Հայաստանին, դա ես չէ, որ պետք է ասեմ: Վստահում եմ մեր մեծերին...

ՆՈՒՆԵ ԶԱՔԱՐՅԱՆ