Ներիշխանական բունտ՝ ընդդիմության ակտիվության ֆոնին

Մինչ ընդդիմությունը դեռ փորձում է կոնսոլիդացվել եւ տալ փողոցային պայքարի մեկնարկը՝ Նիկոլ Փաշինյանի համար ավելի լուրջ պատուհաս է դարձել սեփական թիմը՝ իր տարաբնույթ ճյուղերով եւ իրենից ավելի ազդեցիկ արտաքին տերերով:

Այլեւս անհնար է դառնում կոծկել, որ իշխանական բուրգը փլուզվում է: Որքան էլ զավեշտալի է, բայց օրենսդիրի իշխանական թեւն է սկսել ատամ ցույց տալ գործադիրին: Ակնհայտ է, որ ՔՊ-ում՝ Նիկոլի գլխավորությամբ, դժգոհ են առողջապահության նախարար Անահիտ Ավանեսյանից, ԿԳՄՍ նախարար Ժաննա Անդրեասյանից, ոմանք՝ փոխվարչապետ Մհեր Գրիգորյանից, բայց ոչ մեկին չի ստացվում աթոռից պոկել: Նույնիսկ Երեւանի քաղաքապետ Տիգրան Ավինյանին, ում անվստահություն հայտնելու սցենարը, կարծես թե, գծվել է վաղուց: Եվ ահա Նիկոլը դիմում է ՔՊ-ական պատգամավորների օգնությանը: Վերջիններս էլ ո՛չ ավել, ո՛չ պակաս որոշում են այս գործընթացը սկսել ՀՀ արդարադատության նախարար Գրիգոր Մինասյանից:

Գրիգոր Մինասյանի դեմ ՔՊ-ն ստորագրահավաք էր սկսել՝ միայն հիմա նկատելով, որ նա Վատիկանում ՀՀ նախկին դեսպան Միքայել Մինասյանի եղբայրն է: Այո՛, ուրիշ կոմպրոմատ, տպավորություն է, որ այդպես էլ ՔՊ-ում չգտան ու ստիպված կախվեցին նրանից, որ վերջերս արդարադատության փոխնախարար էր նշանակվել Սիրվարդ Գեւորգյանը՝ ՀՀ երկրորդ նախագահ Ռոբերտ Քոչարյանի դստեր ընկերուհին: Սիրվարդին չներեցին այն, որ ի տարբերություն Նիկոլ Փաշինյանի, ով երջանիկ դեմքով կրծքին էր սեղմել Թուրքիայի նախագահ Էրդողանի գիրքը, նա նույնպիսի երջանիկ դեմքով լուսանկար ունի՝ Ռոբերտ Քոչարյանի հեղինակած գրքով: Սակայն, մինչ ԱԺ իշխող «Քաղաքացիական պայմանագիր» խմբակցությունում «ռազբիրատներ» էր ընթանում, թե՝ ով է մինասյանական, ով՝ հավատարիմ նիկոլական, երեկ երեկոյան տապալվեց այս օպերացիան եւս:

ԻՆՉԻ ՄԱՍԻՆ ԵՆ ՀՈՒՇՈՒՄ ԽՆԴՐԱՆՔՆԵՐՆ ՈՒ ԽԱՐԴԱՎԱՆՔՆԵՐԸ

ՀՀ արդարադատության նորանշանակ փոխնախարար Սիրվարդ Գեւորգյանը հայտարարությամբ է հանդես եկել՝ ընդգծելով, որ խարդավանքները հաղթեցին բանականությանը:

«Հրաժարականի դիմում ներկայացրեցի արդարադատության նախարարի տեղակալի պաշտոնից: Մեծ ցավով ու ափսոսանքով եմ թողնում Արդարադատության նախարարության իրապես պրոֆեսիոնալ թիմը` նախարար Գրիգոր Մինասյանի գլխավորությամբ: Այս համակարգում երկար տարիներ եմ աշխատել, ու դեռ շատ անելիքներ կային: Շատ կուզեի մասնակցել այդ ամենօրյա ծանր, բայց իրապես կարեւոր աշխատանքին: Նորից շնորհակալ եմ վարչապետ Նիկոլ Փաշինյանին, ինձ ցուցաբերված մեծ վստահության համար: Ցավում եմ, որ քաղաքական երկու բեւեռներում ինձ վրա հարձակվեցին չարացած մարդիկ, ովքեր շահարկեցին ամեն հնարավորն ու անհնարը սեփական քաղաքական շահերի կամ անձնական խարդավանքների համար: Ոչ մի պաշտոն կամ աշխատանք ինձ չի կարող ստիպել հարվածի տակ դնել կամ ուրանալ իմ ընկերներին ու գործընկերներին», - շեշտել է Սիրվարդը՝ հանդես գալով զոհի կերպարում եւ, ըստ էության, ի ցույց դնելով, որ հրաժարվում է պաշտոնից՝ իր վաղեմի գործընկեր Գրիգոր Մինասյանին փրկելու համար:

Գրիգոր Մինասյանն էլ իր հերթին է փակագծեր բացել՝ ֆեյսբուքյան գրառմամբ: Նա այլեւս չի թաքցրել, որ իշխող ՔՊ-ում խարդավանքներ են հասունանում:

«Վերջին օրերին բազմաթիվ անգամներ եմ խնդրել տիկին Գեւորգյանին հրաժարական չտալ: Ցավոք, նա մերժեց իմ բոլոր խնդրանքները: Շատ ափսոս, որ առանձին անհատների չափազանց անարդար ու մանրախնդիր հարձակումների պատճառով մեր նախարարությունը եւ պետական համակարգը կորցրեց իրապես արժեքավոր մասնագետի ու կառավարչի: Պառլամենտարիզմի լավագույն դրսեւորումը կլինի նման խարդավանքների համար քաղաքական հասցեական պատասխանատվությունը»,- ընդգծել է նա:

Փաստ է, որ Գրիգոր Մինասյանի եւ ՔՊ-ական պատգամավորների սառը պատերազմը կարող է բորբոքվել կրկին: Եթե այդպես ցանկանա Նիկոլ Փաշինյանը, ով ընդդիմության կողմից անոնսավորվող նոր պայքարի ալիքի ֆոնին՝ փորձում է գործադիրը համալրել իրեն հավատարիմներով: Իսկ այս առումով՝ Գրիգոր Մինասյանի ազգանունից վախերը շատ են: Ավելի ձեռնտու են պապոյանները: Անգամ, եթե նրանք լինեն իրեն պաշտպանելու հարցում այնքան անտաղանդ, ինչպես էկոնոմիկայի նախարար Գեւորգ Պապոյանն է՝ իր ջղագրգիռ պահվածքով: Իսկ այս առումով՝ Գրիգոր Մինասյանի ազգանունից վախերը շատ են:

Այդուհանդերձ, Գրիգոր Մինասյանից ազատվելն այդքան էլ հեշտ չէ՝ հաշվի առնելով նաեւ ԲԴԽ նախագահ Կարեն Անդրեասյանի հանգամանքը, որը բավական մտերիմ հարաբերություններ ունի արդարադատության գործող նախարար Գրիգոր Մինասյանի հետ: Մամուլում արդեն իսկ լուրեր են շրջանառվում, թե ԱԺ ՔՊ խմբակցությանն Անդրեասյանն ինչ-ինչ խողովակներով սպառնացել է, որ եթե իր ընկերոջը հեռացնեն աշխատանքից, նա նույնպես հրաժարականի դիմում է գրելու։

«Անդրեասյանը հստակ մեզ ասել է, որ եթե ձեր ստորագրահավաքի արդյունքում վարչապետը Գրիգոր Մինասյանին հեռացնի աշխատանքից, ապա մի դիմում էլ ես եմ գրելու», - նշել է իշխանական աղբյուրը: Մինչդեռ ԲԴԽ-ի մամուլի քարտուղար Մերի Գեւորգյանը լրատվամիջոցներից մեկի հետ զրույցում ասել է, թե այդ տեղեկատվությունը «զուտ բամբասանք եւ ասեկոսե է», որը ԲԴԽ-ն չի մեկնաբանում։

ԻՇԽԱՆԱՓՈԽՈՒԹՅՈՒՆ՝ ՔՊ-Ի ՆԵՐՍՈՒՄ, ԹԵ՞ ԴՐՍՈՒՄ

Ստեղծված իրավիճակում ամեն պահի կարող է ներիշխանական բունտ հասունանալ, ինչն անդառնալի հետեւանքներ կունենա Նիկոլ Փաշինյանի իշխանության համար: Ստացվում է, որ կրկին հնարավորություն է ընձեռվել իշխանափոխության՝ լինի ՔՊ-ի ներսում, թե դրսում: Կկարողանա՞ ընդդիմությունը Նիկոլից պոկել որոշ նախարարների ու պատգամավորների, սա էլ թերեւս կորոշի իրադարձությունների ելքը, համենայնդեպս, մինչ այժմ դա դեռ չի հաջողվել կամ էլ՝ պարզապես, դրա ժամանակը չէր հասունացել:

Ի դեպ, այս անգամ իշխանական եւ ընդդիմադիր խարդավանքների մեջ եկեղեցին հնարավորինս փորձում է չեզոք դիրքավորվել: Համենայնդեպս, Շիրակի թեմի առաջնորդ Գերաշնորհ Միքայել արքեպիսկոպոս Աջապահյանն իր վերջին հարցազրույցներից մեկում ընդգծել է, թե՝ «Եկեղեցին Բագրատ Սրբազանին չէր էլ սատարում, որ մենակ թողներ»:

Շիրակի թեմի առաջնորդը նշել է՝ եկեղեցին քաղաքական պրոցեսների մեջ չի մտնում, որպեսզի իշխանություն փոխի, սրան բերի, նրան հեռացնի. «Նման պրոցեսների մեջ չի մտնում եւ չի էլ ուզում մտնի։ Բագրատ Սրբազանը տավուշյան մակարդակի վրա խնդիր է ունեցել, ուղիղ արտահայտել է իր դիրքորոշումը, որը հետո վերաճել է այս Սրբազան պայքարի»: Նրա խոսքով՝ խնդիրն, իհարկե, միայն Տավուշին չէր վերաբերում, սակայն ժողովուրդը չսատարեց Բագրատ Սրբազանին։ Թե ինչո՞վ է պայմանավորված դիրքորոշման այսպիսի փոփոխությունը եւ արդյոք սա Միքայել սրբազանի անձնական կարծիքն է, ցույց կտա ժամանակը: Նկատենք նաեւ, որ եկեղեցու վերջին շրջանում հնչեցրած դիրքորոշումները ուղղակի կամ անուղղակի կերպով փշոտ է ընդունվում նաեւ Բագրատ սրբազանի մերձակա շրջապատի կողմից: Ինչեւէ, համենայնդեպս, այս օրերին բոլորի հայացքն ուղղված է դեպի Մայր Աթոռ Սուրբ Էջմիածին: Ավելին՝ քաղաքական գլխավոր ինտրիգը, ամեն դեպքում, հենց այնտեղ է, թե իշխանությունը կգնա՞ Մայր տաճարի վերաօծմանը՝ ի հեճուկս ընդդիմության, թե՞ էլ ավելի կխորացնի եկեղեցի-պետություն չհայտարարված պատերազմը: Իսկ 4 տարի առաջ այս օրը պատերազմ էր արցախյան ողջ սահմանի երկայնքով: Պատերազմը ստացավ 44- օրյա անունը, սակայն սեպտեմբերի 27-ն այդպես էլ չավարտվեց մեր սրտերում ու հոգիներում:

ՀՐԱՆՏ ՍԱՐԱՖՅԱՆ