«Կյանքի խոսք»-ի քարոզիչը դարձել է Թրամփի մոտ հասնելու Նիկոլի վերջին հույսը

Ամիսներ առաջ ԶԼՄ-ներում տարածվեց լուր, թե քրիստոնեական քարոզիչ, Ավետարանական եկեղեցու անդամ ու ԱՄՆ նորընտիր նախագահ Դոնալդ Թրամփի համակիր Ջոել Թեննին հայտարարել է, որ Միացյալ Նահանգների 47-րդ նախագահի երդմնակալության արարողությունից հետո կզբաղեցնի պաշտոն, որն ուղղված է «Հայաստանի ու ԱՄՆ-ի միջեւ հարաբերությունների ամրապնդմանն ու զարգացմանը»։ Շարական երգող, տարբեր Հայ Առաքելական եկեղեցիներից նկարներ հրապարկող այս բողոքական քարոզիչը պարզվում է՝ Հայաստանի «Կյանքի խոսք» աղանդում ակտիվ քարոզչություն է իրականացնում:

Իհարկե, հաշվի առնելով Հայաստանում ստեղծված ողբերգական վիճակը, կարծես թե, այս տեղեկատվության մեջ որեւէ արտասովոր բան չկա, սակայն Փաշինյանի վաշինգտոնյան այցերը եւ «Կյանքի խոսք» առաջնորդի հետ ջերմ ձեռքսեղմումը այլ պատկեր է ստեղծում: Ստացվում է, որ հայ-ամերիկյան հարաբերությունները ոչ թե հմուտ դիվանագիտական հիմքերի վրա են, այլ կրոնական աղանդների տարբեր խոստումների:

Մենք դեռ 2020-ին էինք գրել, որ «Կյանքի խոսքի» առաջնորդ Արթուր Սիմոնյանը պատերազմի օրերին տեղափոխվել է ԱՄՆ: Անշուշտ, Արթուր Սիմոնյանն այդքան էլ ծանրակշիռ ֆիգուր չէ, սակայն հաշվի առնելով ՀՀ կառավարության աղանդասեր դրսեւորումները եւ «Կյանքի խոսքի» հանդեպ առանձնահատուկ մոտեցումները՝ պարզ է դառնում, որ նույնիսկ փոքրիկ ֆիգուրներին կարելի է քարշ տալ եւ դնել պայքարի մեջ՝ հակակշեռելով Հայ Եկեղեցուն:

Թերևս սա է պատճառը, որ այս իշխանություններն իրենց անհաշտ վերաբերմունքը Հայ Եկեղեցու դեմ բացատրում են եկեղեցականների հանդեպ ունեցած առանձին հակակրանքով, մինչդեռ փաստերը վկայում են, որ նրանք թիրախում պահում են հենց Հայ Եկեղեցուն եւ անգամ, եթե ամբողջ հոգեւոր դասը հնազանդորեն կատարի իշխանությունների պատվերը, իրենք դա շատ արագ կօգտագործեն եկեղեցուն կազմաքանդելու եւ ահավոր թուլացնելու համար:

Ի դեպ, Վաշինգտոնում Փաշինյանի եւ «Կյանքի խոսքի» ներկայացուցիչների հանդիպումը մեծ վնասներ կարող է հասցնել հենց այս աղանդին, որովհետեւ նրանք մեծ թակարդի վրա մի փոքրիկ պանիր են դարձել հենց Փաշինյանի ձեռքում: Եվ երբ այդ թակարդը մի օր աշխատի, այդ պանիրը ոչինչ է դառնալու, ինչպես հին խոսքն է ասում, «Եթե անգամ գայլը հոշոտում է քո թշնամուն, դա դեռ չի նշանակում, որ հաջորդը դու չես»: Կրոնակական հարցերում վստահել Փաշինյանին, ով վախենում է անգամ եկեղեցի այցելել, նշանակում դառնալ «հոգեւոր առեւտրական»:

ՀՐԱՆՏ ՍԱՐԱՖՅԱՆ