Հայաստանում ռուսական կինոն է հյուրընկալում

Ապրիլի 3-5-ը Հայաստանում կանցկացվի Ռուսական կինոյի փառատոն, որը կազմակերպվում է Ռոսկինոյի կողմից՝ Ռուսաստանի մշակույթի նախարարության աջակցությամբ։ Երևանը ավանդական ջերմությամբ կընդունի ռուսական ֆիլմերի ցուցադրությունները։ Հայ հանդիսատեսը հնարավորություն կունենա դիտելու ինչպես նորագույն, այնպես էլ ավելի վաղ շրջանի ֆիլմեր, որոնք ներկայացնում են ռուսական կինեմատոգրաֆը։ Անվճար ցուցադրությունների հարթակ կհանդիսանա «Կինոմոսկվան»՝ Երևանի ճարտարապետական գլուխգործոցներից մեկը և երևանցիների սիրելի վայրը։

Անվճար ցուցադրությունների ամրագրում՝ https://www.tomsarkgh.am/hy/category/RFF

ROSKINO-ի գլխավոր տնօրեն Էլզա Անտոնովան հավելել է․ «Նախորդ տարիներին Հայաստանում անցկացված ռուսական կինոյի փառատոնները ցույց են տվել հայ հանդիսատեսի մեծ հետաքրքրությունը ոչ միայն ֆիլմերի դիտման, այլև կինոքննադատների ու ստեղծագործական խմբերի հետ քննարկումների նկատմամբ։ Մենք համոզված ենք, որ նման միջոցառումների պարբերական անցկացումը կնպաստի ժամանակակից ռուսական կինոյի նկատմամբ հետաքրքրության աճին՝ ինչպես լայն հանդիսատեսի, այնպես էլ հայկական կինոարդյունաբերության կողմից։ Հատկապես, որ արդեն կան համատեղ նախագծեր, ներառյալ նոր ֆիլմեր, օրինակ՝ "Снег пригнул бамбук" կատակերգությունը, որը աջակցություն է ստացել Ռուսաստանի Մշակույթի նախարարության և Հայաստանի Ազգային Կինոկենտրոնի կողմից։ Վստահ եմ, որ մեր երկրների միջև կինոյի ոլորտում համագործակցության մեծ ներուժ կա»։

«Ռուսական կինոյի փառատոն Հայաստան 2025»-ի ծրագրում կներառվի հինգ ֆիլմ: Դրանց թվում են անցյալ տարվա կինովարձույթի առաջատարներից երկուսը՝ հեքիաթային ընտանեկան բլոկբաստեր «Հրահանը» (ռեժ. Ալեքսանդր Վոյտինսկի)՝ ըստ Հանս Քրիստիան Անդերսենի հայտնի հեքիաթի մոտիվների, և պատմական մելոդրամա «Խորհրդային Միության Սերը» (ռեժ. Նիկիտա Վիսոցկի, Իլյա Լեբեդև)՝ «ժամանակի պատմություն, պատմված՝ զգացմունքի միջոցով», ինչպես նշում են ֆիլմի հեղինակները։

«Խորհրդային Միության Սերը» դարձել է ռուսական հեղինակավոր «Ոսկե արծիվ» կինոմրցանակաբաշխության հաղթողներից մեկը՝ ստանալով վեց մրցանակ՝ լավագույն սցենարի, օպերատորական աշխատանքի, բեմադրող նկարիչների և զգեստների նկարիչների աշխատանքի, երաժշտության, ինչպես նաև երկրորդ պլանի տղամարդու դերի համար։ Կերպարների զգեստները, դեկորացիաները և պատմական նկարահանման վայրերը հանդիսատեսին տեղափոխում են 1930-40-ական թվականներ։ Վիզուալ էսթետիկան, հրաշալի դերասանական կազմը, դրամատիկ սիրո պատմությունը… – հանդիսատեսին սպասում են աննկարագրելի զգացողություններ և «ճամփորդություն» ժամանակի միջով։

Անիմացիոն լիամետրաժ ֆիլմը՝ «Ջրի բանաձևը» (ռեժ. Արտյոմ Մինակով) հետաքրքիր կլինի ինչպես երեխաների, այնպես էլ մեծահասակների համար։ Բարձր տեխնոլոգիաներով ստեղծված մուլտֆիլմը պատմում է դեռահաս Դանայի մասին, ով ապրում է օվկիանոս-մոլորակի կղզիներից մեկում մուտանտների մեջ։ Աղջիկը դառնում է ծովահենների թիրախ, ովքեր կարծում են, որ նա լեգենդար գանձի՝ խմելու ջրի աղբյուրի բանալին է։

2025 թվականին ռուսական կինոփառատոնները տեղի են ունենում Մեծ հայրենական պատերազմի 80-ամյակի շրջանակներում: Հայաստանի կինոցուցադրությունների ծրագիրը ներառում է նաև երկու ռազմական դրամա՝ «Պոդոլսկի կուրսանտները» (ռեժ. Վադիմ Շմելյով) և «Առաջին Օսկարը» (ռեժ. Սերգեյ Մոկրիցկի)։

«Պոդոլսկի կուրսանտները» ֆիլմը, որը պատմում է երիտասարդ կուրսանտների հերոսության մասին 1941 թվականի հոկտեմբերին Մոսկվայի մոտ, նվաճել է ավելի քան 30 մրցանակ ռուսական և միջազգային կինոփառատոններում։ Ֆիլմի ցուցադրության իրավունքները վաճառվել են Ճապոնիա, Հարավային Կորեա և մի շարք այլ երկրների։

«Առաջին Օսկարը» ֆիլմը նույնպես հիմնված է իրական իրադարձությունների վրա․ հանդիսատեսը կծանոթանա «Գերմանական զորքերի պարտությունը Մոսկվայի մոտ» վավերագրական ֆիլմի ստեղծման պատմությանը, որը դարձել է ԽՍՀՄ առաջին «Օսկար» մրցանակի դափնեկիրը։

ROSKINO-ն, Մշակույթի նախարարության աջակցությամբ, կազմակերպել է ռուսական կինոյի փառատոնները Հայաստանում 2022-2023 թվականներին․ այդ միջոցառումների շրջանակում ցուցադրվել են այնպիսի ֆիլմեր, ինչպիսիք են «Չեբուրաշկան», «Միստր Նոկաուտը», «Սուսերով պարը», «Հանցակիցները», «Մայիսյան օրացույցը», «Ֆիննիկը», «Մարդուկ-ջարդուկը և կախարդական ֆլեյտան», «Կրակը», «Նիկան», «Բուկա․ Իմ սիրելի հրեշը» և այլ ֆիլմեր։

«Ռուսական կինոյի փառատոն Հայաստան 2025» ծրագրի շրջանակում

• «Խորհրդային Միության սերը» (2024, ռեժ. Նիկիտա Վիսոցկի, Իլյա Լեբեդև)

Սա պատմություն է խիզախ և գեղեցիկ սերնդի մասին, որը չի տեսել հեղափոխության ավերածություններն ու քաղաքացիական պատերազմի քաոսը։ Նրանք երազում էին կառուցել նոր կյանք, որտեղ տեղ չէր լինելու մահվան, այլ միայն անսահման սիրո, որը նրանց կուղեկցեր դեպի մեծ հաղթանակներ։ Ֆիլմը պատմում է սիրո, հավատարմության և հերոսական ճակատագրերի մասին։

• «Հրահանը» (2024, ռեժ. Ալեքսանդր Վոյտինսկի)

Հեքիաթային աշխարհում զինվորը, տուն վերադառնալիս, պատահաբար գտնում է կախարդական հրահանը և ազատում է դրա մեջ փակված փոքրիկ Դաշային, որին առևանգել և կախարդել էր չար Լիխոդեյը։ Նրա կախարդանքը վերացնելու համար զինվորին սպասում է վտանգավոր արկածներով լի ճանապարհորդություն։

• «Ջրի բանաձևը» (2024, ռեժ. Արտեմ Մինակով)

Արկածային անիմացիոն ֆիլմ, որը կհետաքրքրի ինչպես երեխաներին, այնպես էլ մեծահասակներին։ Պատանի Դանան ապրում է օվկիանոսային մոլորակի կղզիներից մեկում՝ մուտանտների շրջանում։ Սակայն նա դառնում է ծովահենների թիրախը, որոնք նրան համարում են լեգենդար գանձի՝ խմելու ջրի աղբյուրի բանալին։

• «Պոդոլսկի կուրսանտները» (2020, ռեժ. Վադիմ Շմելև)

1941 թ․ հոկտեմբեր, Մոսկվայի մերձակայք։ Երեքուկես հազար Պոդոլսկի ռազմական ուսանողներ ստանում են հրաման զբաղեցնել Իլյինսկի սահմանագիծը և կանգնեցնել ֆաշիստական զորքերի առաջխաղացումը։ Ֆիլմը պատմում է նրանց հերոսության մասին։ Նրանք տասներկու օր շարունակ կանգնեցրեցին թշնամուն Մոսկվայի ճանապարհին։

• «Առաջին Օսկարը» (2022, ռեժ. Սերգեյ Մոկրիցկի)

Ֆիլմը պատմում է «Օսկար» ստացած առաջին խորհրդային վավերագրական ֆիլմի՝ «Գերմանական զորքերի ջախջախումը Մոսկվայի մոտ» ստեղծման մասին։ Պատմական դրաման ներկայացնում է երիտասարդ կինոօպերատորների արկածները, ովքեր 1941 թվականին որոշում են կռվել ոչ թե զենքով, այլ՝ տեսախցիկով։

Ցուցադրությունների ժամանակացույց՝

Ապրիլի 3-ին (հինգշաբթի)

14:00 - «Ջրի բանաձևը»

16:00 - «Հրահանը»

Ապրիլի 4-ին (ուրբաթ)

14:00 - «Առաջին Օսկարը»

17:00 - «Խորհրդային Միության սերը»

Ապրիլի 5-ին (շաբաթ)

17:00 - «Պոդոլսկի կուրսանտները»

 Հավելյալ տեղեկություն

ROSKINO – պետական կազմակերպություն է, որը ներկայացնում է ռուսական աուդիովիզուալ բովանդակության արդյունաբերությունը միջազգային կինոփառատոներում և կինոշուկաներում։ Ընկերության 100% բաժնետոմսերը պատկանում է Պետական գույքի կառավարման դաշնային գործակալությանը։ 2024 թվականին ընկերությունը նշեց իր հարյուրամյակը (Ռոսկինո-ն հանդիսանում է «Սովէքսպորտֆիլմ» կազմակերպության իրավահաջորդը, որի պատմությունը սկիզբ է առնում 1924 թվականից) www.roskino.org