Այսօր ժողովրդին թուլացնում են, որ ղեկավարը մնա. Մարգարիտա Պետրոսյան

Արժանապատիվ կյանքը՝ դա հզոր պետությունն է, որտեղ ղեկավարը իր ժողովրդին պաշտպանում է՝ ոչ թե ծաղրում։ Դա պետությունն է, որտեղ մարդուն չեն նվաստացնում սեփական կարծիք ունենալու, հնչեցնելու կամ արժանապատվորեն ապրելու համար։ Դա երկիր է, որտեղ ուժը չափվում է պատասխանատվությամբ, ոչ թե բարձրախոսներով։

 

Եվ այսօր մենք չունենք այդ արժանապատիվ կյանքը։ Մենք ունենք իշխանություն, որը ձեր ձայնով եկել է, բայց՝ ձեր վստահությունը դարձել է ձեր ցավը։ Նրանց ամեն քայլը ոչ միայն երկիրն է տանում ծանր ու վտանգավոր ուղղությամբ, այլև ձեզ՝ որպես քաղաքացի, որպես մարդ, օրեցօր նսեմացնում է։ Զրկում է ձեզ ձեր ձայնից, ձեր արժանապատվությունից, ձեր ազատ կամքից։

Հաճախ ասում են՝ ժողովրդավար երկիր ենք։

 

Այո, այդպես է։ Ու հենց այդ պատճառով եմ հիշեցնում. Ժողովրդավար երկրում դուք բոլորդ վարչապետ եք։ Չկա ուժեղ ղեկավար առանց ուժեղ ժողովրդի։ Բայց այսօր ժողովրդին թուլացնում են, որ ղեկավարը մնա։ Չկա արժանապատիվ պետություն, երբ մարդը վախով է ապրում իր իսկ պետության մեջ։

 

Եվ չպետք է մոռանալ՝ ձեր քվեն միայն անցյալ չի, այն նաև ներկա է ու ապագա։ Ցավալի է, բայց այս իշխանությունը բերել էիք հույսով, բայց մնացիք՝ հիասթափությամբ։ Եկել էր խոստումով, բայց մնաց՝ լռությամբ։

Եկել էր ժողովրդի անունից, բայց այսօր կանգնած է ժողովրդի դեմ…», - գրել է Նաիրի խոշորացված համայնքի «Իմ հզոր համայնք» խմբակցության ավագանու անդամ ՄԱՐԳԱՐԻՏԱ ՊԵՏՐՈՍՅԱՆԸ: