«ԱՆԶԻՋՈՒՄ ՊԱՅՔԱՐԵԼ Է ՈՍՈԽԻ ԴԵՄ, ՄԱՍՆԱԿՑԵԼ ՆԱԵՎ ՀԱԴՐՈՒԹԻ ԾԱՆՐ ՄԱՐՏԵՐԻՆ». ԱՆՄԱՀ ՀԵՐՈՍ ՀՈՒՍԻԿ ՀՈՎԱԿԻՄՅԱՆ

Ապրիլի 23-ը Արցախյան քառօրյա և 44֊օրյա դաժան պատերազմների անմահ հերոս ՀՈՒՍԻԿ ԳՐԻԳՈՐԻ ՀՈՎԱԿԻՄՅԱՆԻ ծննդյան օրն է, կդառնար 29 տարեկան։

«Եռաբլուր» զինվորական պանթեոնում գտնվող նրա շիրիմին են այցելել հարազատներ, ընկերներ, ծաղիկներ խոնարհել ու խնկարկել։ Հուսիկը ծնվել է 1996 թվականին, Արարատի մարզի Բերքանուշ գյուղում։ 2014֊2016 թվակա ներին ծառայել է Արցախի հարավում Ջրականում։

Անմահ հերոսի քույրը ՇՈՒՇԱՆԸ, Iravunk. com -ի հետ զրույցում խորը ցավը սրտում նշեց.

«Եղբայրս ծառայության ընթացքում մշտապես աչքի է ընկել լավագույն կողմերով, արժանացել շնորհակալագրերի ու պատվոգրերի։ Հուսիկը մասնակցել է 2016֊ի Ապրիլյան քառօրյա առճակատմանը, 2020 ֊ի 44֊օրյա դաժան պատերազմին։ Սեպտեմբերի 28֊ին մեկնել է Ջրականի առաջնագիծ։ Անզիջում պայքարել է ոսոխի դեմ, մասնակցել նաև Հադրութի համար մղված ծանր մարտերին։ Հոկտեմբերի 21֊ին հերթական մարտական առաջադրանքը կատարելիս հերոսաբար զոհվել է։ Պետական սահմանը պաշտպանելիս ցուցաբերած անձնական արիության ու խիզախության համար ՀՀ նախագահի հրամանագրով պարգևատրվել է «Մարտական ծառայություն», իսկ ԱՆ նախագահի հրամանագրով հետմահու «Արիության» մեդալներով։ Հզոր, Հուսս, իմ անպարտ կամավոր, շնորհավոր տարեդարձդ, իմ միակ, իմ անգին, իմ թանկ ապեր։ Դու միշտ էլ ուրիշ ես եղել, լույսս, քո քայլերն ու վեհությունը սահման չի ունեցել երբեք։ Իմանալով անգամ, թե ինչ է պատերազմը, որ կարող ես անգամ տուն չդառնալ, ոտքի ելար նորից, լույսս, որ քո անգին կյանքի գնով կյանք պարգևեիր։ Միայն թե չմտածեցիր Հուս, որ առանց քեզ մենք չենք կարող....

Հենց առաջին օրը գիտեի, որ պիտի գնաս։ Ասել էիր Շուշանին չասեք։ Երանի չիմանայի, երանի քո անգին կյանքի գնով ինձ կյանք չտրվեր։ Գիտեի, գիտեի, որ քեզ ոչ ոք չի կարող հաղթել, հզորս, թանկս, միայն սիրտդ, սիրտդ, ամենամեծ դավաճանը դարձավ» ....

ՇՆՈՐՀԱՎՈՐ ԵՐԿՆԱՅԻՆ ԾՆՈՒՆԴԴ, ԱՆՄԱՀ ՀԵՐՈՍ ։ՔՈ ՍԽՐԱՆՔՆ ԱՆՄԱՀ Է, ՔՈ ԱՆՈՒՆԸ ՄԵՐ ՍՐՏԵՐՈՒՄ....

Պատրաստեց ՀՈՎՀԱՆՆԵՍ ՍԱՐԳՍՅԱՆԸ