Կրկնազատիկը վերածվեց տոնի, ներկա էր Թալինի համայնքապետը

Կրկնազատիկը Մաստարայում՝ հոգևոր լիցքի, արժեքների ու համախմբվածության տոն.

Այսօր Մաստարա բնակավայրը նորից վերապրեց Կրկնազատկի տոնական ու հավատքով լցված օրն՝ ի նշան վերածննդի, հույսի ու ազգապահպանության ամուր արժեքների։ Տոնը, որը խորապես արմատավորված է հայ եկեղեցու և ազգային մշակույթի մեջ, մեր համայնքում դարձավ համախմբման, հոգևոր վերելքի և մշակութային արժեքների ներկայացման հիասքանչ առիթ։

Օրը մեկնարկեց Մաստարայի Սուրբ Հովհաննես եկեղեցում մատուցված Սուրբ և անմահ պատարագով, Մայր Աթոռ Սուրբ Էջմիածնից Մաստարայի Սուրբ Հովհաննես եկեղեցի էր տեղափոխվել Սուրբ Ստեփանոս Նախավկայի Մասունքարանը:

Օրը շարունակվեց դեպի Սուրբ Նախավկա եկեղեցի  ուխտագնացությամբ, որը դարձել է համայնքային գեղեցիկ ավանդույթ։
Համայնքապետարանի ղեկավարության, աշխատակիցների և համայնքի բնակիչների հետ բարձրացանք դեպի Սուրբ Նախավկա եկեղեցի։ Ուխտավորների շարքը վերածվեց հավատքի, աղոթքի և հանդարտ մտորումների ուղու։ Եկեղեցու շուրջն օրհնվեցին աշխարհի չորս կողմերը, Արագածոտնի հոգևոր հովիվ Տեր Հայկ քահանայի ձեռամբ, բարձրացվեց համընդհանուր աղոթք:

Հոգևոր պահերին հաջորդեց մշակութային միջոցառումը։
Մաստարայի Սուրբ Հովհաննես եկեղեցու տարածքը վերածվեց մշակութային կենտրոնի, ուր հնչեցին ազգային երգեր, կատարվեցին պարեր լցված հավատքով ու հայրենասիրությամբ։ 
Եկեղեցու տարածքում ազգային խոհանոցը և արհեստները ներկայացնող տաղավարներով հանդես եկան Մաստարա, Կարմրաշեն, Ոսկեթաս, Ակունք, Եղնիկ , Գառնահովիտ, Զովասար և Ծաղկասար բնակավայրերը:

Մաստարայում Կրկնազատիկը վերածվեց տոնի, որից լույս ու ուժ ստացան բոլորը։