Դարչինը կարող է թուլացնել դեղամիջոցների ազդեցությունը. Food Chemistry

Դարչինը աշխարհի ամենահին և ամենատարածված համեմունքներից մեկն է, որը հայտնի է ոչ միայն իր համով, այլև բուժիչ հատկություններով։ ԱՄՆ Բնական արտադրանքի հետազոտությունների ազգային կենտրոնի գիտնականները պարզել են, որ դարչինի ակտիվ բաղադրիչը կարող է խանգարել դեղատոմսով դեղերի աշխատանքին։ Գիտական աշխատանքը հրապարակվել է Food Chemistry բժշկագիտական  հանդեսում։

Հետազոտողները պարզել են, որ դարչինի մեջ պարունակվող հիմնական միացությունը՝ ցինամալդեգիդն, ակտիվացնում է օրգանիզմում դեղերի նյութափոխանակության համար պատասխանատու ընկալիչները։ Դա նշանակում է, որ եթե չափից շատ դարչին օգտագործելու դեպքում, դեղամիջոցները կարող են ավելի արագ արտազատվել օրգանիզմից, քան անհրաժեշտ է, և կորցնել արդյունավետությունը։

«Եթե մարդը մեծ քանակությամբ դարչինի հավելումներ է ընդունում՝ առանց բժշկին տեղյակ պահելու, դա կարող է հանգեցնել նրան, որ դեղամիջոցը չազդի անհրաժեշտ կերպով»,-ասել է կենտրոնի ավագ գիտաշխատող Շաբանա Խանը։

Թեև առավոտյան սուրճին մի փոքր դարչին ավելացնելը մեծ բան չէ, բարձր կոնցենտրացիայի հավելումները կարող են վտանգ պարունակել, հատկապես խրոնիկական հիվանդություններ ունեցող մարդկանց համար՝ սկսած շաքարախտից և հիպերտոնիայից մինչև դեպրեսիա։

Դարչինի տարբեր տեսակները նույնպես ունեն տարբեր ռիսկի մակարդակներ։ Դարչինի յուղը, որը արտաքինից օգտագործվում է որպես հակասեպտիկ կամ համեմունքային միջոց, գործնականում ոչ մի ազդեցություն չունի դեղամիջոցների վրա: Սակայն դարչինի կեղևը, հատկապես կասիա տեսակի դարչինը, որը պարունակում է կումարինի՝ բնական հակակոագուլյանտի բարձր մակարդակ, կարող է վտանգավոր լինել արյունը նոսրացնող դեղամիջոցներ ընդունող մարդկանց համար:

«Շրի Լանկայից ստացված իսկական ցեյլոնյան դարչինն շատ ավելի քիչ կումարին է պարունակում և, հետևաբար, համարվում է ավելի անվտանգ»,-ասում է կենտրոնի փոխտնօրեն Ամար Չիտտիբոյնան։

Գիտնականները նշում են, որ կարևոր է շարունակել ուսումնասիրել օրգանզիմի վրա դարչինի կենսաքիմիական ազդեցությունը և դեղամիջոցների հետ հնարավոր փոխազդեցությունները։ Սակայն մինչև կլինիկական փորձարկումների արդյունքները հայտնի չլինեն, հետազոտողները խորհուրդ են տալիս զգույշ լինել։

«Յուրաքանչյուր ոք, ով մտածում է դարչին օգտագործել որպես հավելում, հատկապես եթե ընդունում է դեղատոմսով դեղամիջոցներ, պետք է նախ խորհրդակցի իր բժշկի հետ»,-ասել է հետազոտության համահեղինակ Բիլ Գեռլին։