Ես ոգեշնչվել եմ մեր անվանի լեգենդար մարմնամարզիկ Ալբերտ Ազարյանից
Հայաստանի մարմնամարզության հավաքականի անդամ, Աշխարհի չեմպիոն, Եվրոպայի կրկնակի չեմպիոն, Օլիմպիական խաղերի բրոնզե մեդալակիր Արթուր Դավթյանը Իտալիայի Ռիմինի քաղաքում կայացած Սպորտային մարմնամարզության Եվրոպայի առաջնության հենացատկի եզրափակչում հավաքեց 14,850 միավոր և երրորդ անգամ նվաճեց Եվրոպայի փոխչեմպիոնի տիտղոսը։ Ափսոս, Արթուր Ավետիսյանը և Գագիկ Խաչիկյանը մեդալներ չնվաճեցին։ Ավետիսյանն օղակների վարժությունում 14,800 միավորով գրավեց չորրորդ տեղը։ Խաչիկյանը նժույգ թափերի վարժությունում 12,466 միավորով 9-րդն էր։ Հաջող հանդես եկան մեր երկրի մարմնամարզության երիտասարդական թիմի անդամները, առանձին գործիքներից նժույգ թափերի եզրափակչում Համլետ Մանուկյանը 14,500 միավորով դարձավ Եվրոպայի չեմպիոն, իսկ Մամիկոն Խաչատրյանը 14,266 միավորով արժանացավ բրոնզե մեդալի։
«Իրավունքի» հետ զրույցում, անվանի մարմնամարզիկ, արծաթե մեդալակիր ԱՐԹՈՒՐ ԴԱՎԹՅԱՆԸ այսպես մեկնաբանեց իր նվաճումը. «Եզրափակչում եղավ նույնը, ինչ որակավորման փուլում, երկրորդ ցատկս լավ չկատարեցի։ Ճիշտ է, որակավորման փուլում լրիվ ուրիշ ցատկ էի կատարել, սակայն այսօր իմ բարդ ցատկը կատարեցի։ Ստացվեց սխալներով։ Նույն սխալը կրկնվեց, ինչ առաջին օրն էր, ինչը նշանակում է, որ այդ ուղղությամբ պետք է աշխատենք և շտկենք։ Զայրացած եմ, որ ոսկե մեդալ չնվաճեցի, քանի որ այդ օրը աղջկաս ծննդյան օրն էր, 5 տարեկան դարձավ։ Ցանկանում էի նրան շնորհավորել ոսկե մեդալով։ Այս արծաթը ինձ ավելի մոտիվացրեց Փարիզի Օլիմպիական խաղերից առաջ։ Պարտվելուց հետո միշտ ցանկանում ես հաղթել։ Կաշխատենք այս սխալների վրա, որ ամենակարևոր մրցաշարում Օլիմպիական խաղերի ժամանակ չկրկնեմ»։ Նշենք, որ մեր թիմի առաջատար Արթուր Դավթյանը որակավորման փուլում վաստակել էր 14,416 միավոր։ Առաջին ցատկի գնահատականը 15,100 էր։ Երկրորդ ցատկի ժամանակ բարդությունը նա փոխեց։ Մրցավարները գնահատեցին 13,733 միավոր։ Արթուր Դավթյանը վերջերս դարձել էր նաև Աշխարհի գավաթի հաղթող ու նվաճել Օլիմպիական խաղերի ուղեգիր։ Հենացատկի եզրափակչում նա 15,166 միավոր էր հավաքել։
Մեզ հաջողվեց զրուցել նաև երիտասարդների կազմում հանդես եկող, ոսկե մեդալակիր երիտասարդների Աշխարհի կրկնակի չեմպիոն, միջազգային կարգի սպորտի վարպետ, ծնունդով Էջմիածնի շրջանի Ապագա ԳՅՈՒՂԻՑ, 16-ամյա ՀԱՄԼԵՏ ՄԱՆՈՒԿՅԱՆԻ հետ։
- Շնորհավորում ենք Համլետ հաղթանակի առթիվ ։
֊ Շատ շնորհակալ եմ։ Հանդես եմ եկել նժույգ թափեր վարժությունում, 14,500 միավոր վաստակեցի ու նվաճեցի Եվրոպայի չեմպիոնի բաղձալի տիտղոսը։ Շատ երկար էի սպասել այս հաղթանակին։ Երկու անգամ արծաթե մեդալ էի նվաճել Եվրոպայի առաջնությունների ժամանակ ու ինչ ֊ինչ պատճառներով ինձ չէր հաջողվում նվաճել Եվրոպայի չեմպիոնի տիտղոսը, շատ ուրախ եմ, որ վերջապես կարողացա դառնալ Եվրոպայի չեմպիոն։ Անչափ հպարտ եմ, որ կարողացա հայրենիքից դուրս ծածանել մեր երկրի եռագույն դրոշը, հնչեցնել մեր երկրի հիմնը, այդ պահին անկեղծ ասած շատ աննկարագրելի զգացողություններ առաջացան ինձ մոտ, կարծես շոկի մեջ լինեի։ Այս մեծ հաղթանակս նվիրում եմ իմ հայ ազգին, մեր բոլոր զինվորներին ու մաղթում խաղաղություն մեր երկրին։ Սա շատ կարևոր հաղթանակ էր ինձ համար, շատ մեծ մոտիվացիա տվեց ինձ, այս նվաճումը պարտավորեցնող է, որ հետագայում կարողանամ պահել այս հաղթանակը ու միշտ հաղթեմ, այսինքն սրանով չեմ սահմանափակվելու, հաղթանակներս կլինեն շարունակական։ Ուսի վնասվածք ունեի, սակայն կարողացա հաջող հանդես գալ։ Ես ոգեշնչվել եմ մեր անվանի լեգենդար մարմնամարզիկ Ալբերտ Ազարյանից, նրա հետ նույն մարզադահլիճում պարապելը իսկական հաճույք էր, ցավոք հեռացավ մեզանից, ոգեշնչվում եմ նաև մեր անվանի մարմնամարզիկներից Արթուր Դավթյանից ու Հարություն Մերդինյանից։ Իսկ ահա բրոնզե մեդալակիր Երիտասարդների Աշխարհի փոխչեմպիոն, Օլիմպիական և Եվրոպական փառատոնների հաղթող ՄԱՄԻԿՈՆ ԽԱՉԱՏՐՅԱՆԸ, մեզ հետ զրույցում այսպես մեկնաբանեց իր նվաճումը. «Նժույգ թափեր վարժությունում 14,266 միավորով դարձել եմ Եվրոպայի առաջնության բրոնզե մեդալակիր։ Եթե համեմատեմ Աշխարհի առաջնության հետ, ապա այս անգամ կարող էի ավելի լավ հանդես գալ, սակայն չեմ հուսահատվում, քանի որ ամեն ինչ դեռ առջևում է ու այս բրոնզե մեդալն իմ առաջին մեդալն էր Եվրոպայի առաջնությունից։ Սա մոտիվացիա տվեց հենց, որպեսզի ավելի լավ պարապեմ ու հետագա մրցաշարերում փոխեմ մեդալի գույնը։ Մրցաշարից առաջ ուսումնամարզական հավաքների էինք մասնակցել Թիֆլիսում։ 17 տարեկան եմ, անձնական մարզիչս Արտակ Այդինյանն է։ Աշխարհի առաջնությունն էլ կլինի հաջորդ տարի, ջանք ու եռանդ չեմ խնայելու, որպեսզի կարողանամ լավ հանդես գալ։ Շնորհակալ ենք, որ մշտապես ուշադրության կենտրոնում եք պահում մեզ ու լուսաբանում մեր նվաճումների մասին, անխափան գործունեություն Ձեր թերթին ։
Պատրաստեց ՀՈՎՀԱՆՆԵՍ ՍԱՐԳՍՅԱՆԸ