«Երևանյան Հեռանկարներ» փառատոնը կմեկնարկի «Գրեմմիի» հնգակի մրցանակակիր «The Swingles» վոկալ խմբի համերգով
Արխիվ 16-20Ապրիլի 29-ին Արամ Խաչատրյան համերգասրահում, բրիտանական «The Swingles» վոկալ խմբի համերգով, կմեկնարկի «Երևանյան հեռանկարներ» միջազգային երաժշտական 20-րդ հոբելյանական փառատոնը:
Խումբը հանդես կգա Look Back (ForWard) ծրագրով, որը հետահայաց է խմբի 50-ամյա երաժշտական պատմությանը: Կհնչեն 60-70-ականների երգիչ-երգահանների ստեղծագործություններ: Խմբի երկացանկն ընդգրկում է համաշխարհային դասական, ջազ, էթնիկ, ժամանակակից` բոլոր ազգերի և ժամանակների երաժշտություն:
50 տարվա պատմություն ունեցող և հինգ «Գրեմմիի» արժանացած խումբը ձևավորվել է Փարիզում` Ուորդ Սվինգլի կողմից: Առաջին «Սվինգլները» Էդիտ Պիաֆին, Շարլ Ազնավուրին և Միշել Լեգրանին ձայնակցողներն էին, նրանց մեջ էր նաև վերջինիս քույրը` Քրիստին Լեգրանը:
Խմբին համաշխարհային ճանաչում է բերել 1960 թվականին թողարկած Յո. Ս. Բախի ստեղծագործությունների փոխադրումը ութ ձայնի համար: «Սվինգլների» նորարարական և վիրտուոզ երգեցողությանը անմիջապես հիացական արձագանքներ ուղղեցին Էլլա Ֆիցջերալդը, Եհուդի Մենուհինը, այլ մեծանուն երաժիշտներ:
Այսօր «The Swingles»-ի կազմում ընդգրկված են երգիչներ Բրիտանիայից, ԱՄՆ-ից, Կանադայից և Գերմանիայից: «Սվինգլը» արդեն կես դար շարունակ ընդլայնում է վոկալ երաժշտության պատկերացումների հորիզոնը։ Նրանք դարձել են բազմամիլիոնանոց լսարանի սիրելիները հոլիվուդյան և այլ հայտնի ֆիլմերի սաունդթրեքները ձայնագրելու համար:
Մարդկային ձայնով տարբեր երաժշտական գործիքների ձայների վերարտադրումը խմբի չգերազանցված կարողությունն է, որը տասնյակ տարիների ընթացքում նմանակվել է բազմաթիվ կատարողների կողմից` ոգեշնչման աղբյուր դառնալով բազմաթիվ կոմպոզիտորների համար: