Զոհի կերպարանք չեմ ընդունելու. դիմեք հոգեբաններին թող պարզեն, թե ինչո՞ւ է զայրացրել «Իշխանություն 2» ֆիլմը. Մհեր Մկրտչյան

Երեւանի փոխքաղաքապետ Տիգրան Ավինյանը պատրաստվում է մոտակա ժամանակ լուծարել «Մհեր Մկրտչյան» արտիստական թատրոնի գեղարվեստական ղեկավարի հաստիքը: Համացանցում այս մասին գրառում է կատարել ռեժիսոր Մհեր Մկրտչյանը, ով հենց թատրոնի գեղարվեստական ղեկավարն է: Ստեղծված իրավիճակի վերաբերյալ «Իրավունքը» զրուցել է նրա հետ:

— Պարոն Մկրտչյան, ըստ Ձեզ, «Մհեր Մկրտչյան»արտիստական թատրոնի գեղարվեստական ղեկավարի հաստիքը լուծարելը հաշվեհարդա՞ր է Ձեր նկատմամբ` «Իշխանություն 2» ֆիլմի համար:

— Ինձնից ազատվելու ցանկությունը դժվար կապված լինի իմ մազերի գույնի հետ: Կրկնում եմ` ինչ արդեն գրել եմ` այս թեմայով վայնասուն չեմ բարձրացնելու, զոհի կերպարանք չեմ ընդունելու: Հիսունանց մարդիկ պետք է իրենց ավելի հանգիստ եւ լուրջ պահեն:

— Եթե նույնիսկ կրճատվի Ձեր հաստիքը, Դուք էլի կշարունակե՞ք Ձեր պայքարը, թե՞ կվիրավորվեք նման մոտեցումից եւ կհեռանաք երկրից:

— Ումի՞ց վիրավորվեմ: Իշխանությունների՞ց: Կամ... Հանեցին, լուծարեցին.... Ի՞նչ կփոխվի: Իմ մարդ տեսակը, անունը եւ ազգանունը կմնան նույնը: Երկրից գնալու ոչ մի միտք չունեմ:

— «Իշխանություն 2» ֆիլմի պրեմիերայից հետո շատ է քննարկվում, թե արդյոք ինչ ներկայացրել եք, այն է, ինչը չհաջողվեց ընդդիմությանը, այսինքն՝ հասցնել պայքարն իր կուլմինացիային, թե՞ այդուհանդերձ դեռ հնարավոր է նման իրական սցենար` իրական քաղաքական պայքարում:

— Ֆիլմում ոչ մի անհնար տեսարան, տեքստ կամ կերպար չկա: Ես հանդիսատեսին հեքիաթ չեմ ներկայացրել:

— Խոսե՞լ եք «Իշխանություն 2» ֆիլմի մասին Սերժ Սարգսյանի հետ: Ի՞նչ տպավորություններ նա ունի այս անգամ իր կերպարի մասին:

— Պրեմիերային մենք իրար կողք էինք նստած եւ, իհարկե, շատ հետաքրքիր էր նրա ռեակցիաները տեսնել: Բայց…հավատացեք` դա ամենահեշտ բանը չի...

— Որքան էլ Ալիսան հավաքական կերպար է, հնարավոր համարո՞ւմ եք, որ կին առաջնորդը կարող է իրականացնել այն, ինչը չի հաջողվում տղամարդկանց:

— Ամեն մարդ ունի իր ընդունակությունների սահմանը: Հարցն ընդամենը դրանում է: Դրանում է նաեւ անհաջողությունների պատճառը: Էական չի՝ չարին հաղթողը կլինի կին, թե՝ տղամարդ:

— Ֆիլմում «կոմպրոմատներով» հիշողության կրիչը ակնա՞րկ էր, որ իշխանության մասին ընդդիմությունն իրականում գիտի շատ ավելին, սակայն սպասում է «հստակ եւ ուժեղ հարվածելու» ճիշտ ժամանակին, ինչպես ֆիլմում է ասվում:

— Հիշեցնեմ, որ դուք խոսում եք գեղարվեստական ֆիլմի մասին...

— Ըստ Ձեզ՝ ֆիլմի ո՞ր հատվածն է ավելի շատ իշխանությանը զայրացրել:

— Ես նրանց նյարդային համակարգին ծանոթ չեմ: Ուղղեք այդ հարցը հոգեբաններին:

— Առողջ քննադատությանը նման մոտեցումն ինչի՞ արդյունք է:

— Կարծում եմ` շատ մանր լինելու:

— 2018 թվականից հետո կա՞ մի լուր, որ լսեք ու չզարմանաք:

— Անհնար է արդեն զարմանալ:

ՆՈՒՆԵ ԶԱՔԱՐՅԱՆ

Այս թեմայով Հայ ժողովրդին ստրկացնելու նպատակ ունեցող Նիկոլին միասնական պիտի հեռացնենք. Աննա Մկրտչյան Փաշինյանը 2018-ին սպանել է Հայաստանի պետականությունը. Աննա Մկրտչյան Ակնհայտ է, որ Արեւմուտքը հոգնել է այս ամենից. Մհեր Հակոբյան Առավոտյան պատգամավորները կուղղեկցեն Սամվել Վարդանյանին Երեւանի քննչական տեղափոխող մեքենային Պատգամավորները երաշխավորություն են ներկայացնում՝ Աշոտյանի խափանման միջոց կալանքը փոխելու համար