Վաշինգտոնը «տակից» Մոսկվայի՞ն է խնդրել` զսպել Թեհրանին
Միջազգային2023 թվականի ՀՀ կառավարության գործունեության կատարողականի քննարկման ժամանակ իր ելույթում (Տե´ս նաեւ https://iravunk.com/?p=280971&l=am) Նիկոլ Փաշինյանն անդրադարձավ նաեւ Իրանի հետ հարաբերությունների հարցին: Ըստ նրա՝ Հայաստան-Իրան հարաբերություններն այս որակի մեջ են. «Պետականության հնագույն ավանդույթներ ունեցող մեր հարեւանի հետ մեր հարաբերությունները հիմնված են բնական շահերի վրա, ինչն այդ հարաբերությունները դարձնում է առանձնահատուկ: Ընդ որում, Արեւմուտքի հետ մեր հարաբերությունների զարգացումը չենք հակադրել, չենք հակադրում ու չենք հակադրի Իրանի հետ մեր հարաբերություններին ու Իրանի հետ հարաբերությունները չենք հակադրել, չենք հակադրում եւ չենք հակադրի Արեւմուտքի հետ հարաբերություններին»:
Ինչքանով է դա այդպես, երբ նույն Իրանի գնահատմամբ, Հայաստանի սահմանները լցված են մասնավորապես իրանական ուղղությամբ ամենասովորական լրտեսությունն իրականացնող «եվրաշպիոններով», հարցի մի կողմն է: Սակայն ամբողջ խնդիրն այն է, որ եթե համեմատաբար հանդարտ իրավիճակում Թեհրանը մի փոքր այլ աչքով կարող էր նայել ՆԱՏՕ-ական պետությունների ներկայացուցիչների առկայությանն իր սահմանների մոտ, բայց ահա իրավիճակը կտրուկ սրվել է, եւ գնահատումներն էլ, բնական է, կփոխվեն:
Ամեն դեպքում, հասել ենք մի փուլի, երբ արեւմտյան տարաբնույթ աղբյուրները պնդում են, թե անգամ Վաշինգտոնում են անխուսափելի համարում Իրանի եւ նրա դաշնակիցների կողմից Իսրայելի վրա հրթիռային հարձակումը։ Այդ մասին, օրինակ, գրում է Bloomberg-ը՝ պնդելով, թե ամերիկյան վարչակազմի կարծիքով՝ Իրանը եւ նրա դաշնակիցները կարող են հարձակվել Իսրայելի ռազմական եւ կառավարական օբյեկտների վրա։ Ավելին, մի շարք այլ հեղինակավոր աղբյուրներ էլ վստահ են, որ նման զարգացումը վերջնականապես վերընտրվելու հարցում «կթաղի Բայդենի շանսերը»։ Ընդ որում, որ Նեթանյահուն նաեւ նման հետեւանքները հաշվի առնելով է, որ Դամասկոսի իրանական հյուպատոսարանին հարվածելու հրաման տվեց:
Թե ինչու, կարելի է կռահել. եթե Իրանը հարվածում է, ապա ԱՄՆ-ն միանգամից կանգնում է միջամտել-չմիջամտելու հարցի առաջ, եւ որ տարբերակն էլ որ Բայդենն ընտրի, իրեն ուղղված խոշոր հարված է դառնում: Կփորձի՞ Իսրայելին պաշտպանել, որին, ի դեպ, տարածաշրջանում գտնվող ամերիկյան նավատորմը պատրաստ լինելու մասին հայտարարել է, ուրեմն կլինի պատասխան հարվածը: Ու ոչ միայն ամերիկյան նավերին, այլ՝ ռազմաբազաներին, եւ ոչ միայն ուղիղ Իրանի կողմից, այլ տարածաշրջանի իրանամետ բոլոր մեծ ու փոքր խմբավորումների: Ու այդ պատասխանից հետո ի՞նչ է անելու Բայդենը, ողջ ամերիկյան ուժն ուղղելու է Իրանի դե՞մ: Ի՞նչ միջոցներ դա կխլի, ի՞նչ կորուստներ է խոստանում, եթե պատշաճ լոգիստիկայի եւ դաշնակիցների բացակայությամբ գնաս նման քայլի. դա արդեն կործանարար հարված է վերընտրվելու ծրագրերին: Մինչդեռ շատ ավելի լուրջ հետեւանքներ էլ կան, եթե Ռուսաստանն ու Չինաստանը, ինչպես ենթադրելի է, անմիջականորեն պաշտպանեն Իրանին: Իսկ եթե չօգնի Իսրայելին, ապա վերջինս ինչքա՞ն կդիմանա, այդ դեպքում ի՞նչ քննադատության է բախվելու Բայդենը:
Միակ տարբերակն ամեն կերպ Իրանին պատասխան հարվածից հետ պահելն է, եւ կան խոսակցություններ, որ ԱՄՆ-ն դիմել է Սաուդյան Արաբիային, Քաթարին, ԱՄԷ-ին, Իրաքին՝ խնդրելով Թեհրանին կոչ անել՝ թուլացնել լարվածությունը Իսրայելի հետ: Բայց նման փորձ արեց Թուրքիան, եւ Թեհրանը միանգամից մերժեց, եւ դժվար չէ հասկանալ, որ մյուս միջնորդությունները եւս կմերժվեն:
Վաշինգտոնի համար իրոք սա արդեն այն լրջության խնդիր է, որ, ըստ որոշ տեղյակ աղբյուրների, «հատուկ խողովակներով» փորձել է օգնություն ստանալ… Մոսկվայից՝ հասկանալով, որ միակ կողմը, ում հետ Իրանն այս պահին կխոսի պատասխան տալ-չտալու հարցով, Ռուսաստանն է: Բնականաբար, դա ենթադրում է Իրանի եւ Ռուսաստանի հետ կապված մի շարք զիջումներ: Նույն աղբյուրները պնդում են, որ ակտիվ քննարկումները դեռ շարունակվում են, եւ դեռ հնարավոր չէ ասել՝ այս «օպերացիան» արդյունավետ կլինի՞:
Թերեւս, այս գործընթացին դեռ անդրադառնալու առիթ կունենանք: Սակայն արդեն այս պահին էլ ակնհայտ է, որ տեղի ունեցողը խոսում է մասնավորապես Մերձավոր Արեւելքի ուղղությամբ առկա գլոբալ իրավիճակային փոփոխության մասին: Այն է՝ ԱՄՆ-ի դիրքերն այն կարգի են թուլացել, որ Մոսկվայի միջնորդությամբ Իրանին զսպելը (եթե լուրը հաստատվի) դարձել է միակ ճանապարհը: Եթե այս սցենարն էլ չեղարկվի (իսկ դա կարող է ամեն պահի լինել), Իրանի պատասխան հարվածը դառնալու է անխուսափելի:
Բայց մեզ համար ամենավատն այն է, որ նման իրավիճակում Նիկոլը դեռ փայփայում է Արեւմուտքից ինչ-որ ռեալ օգնություն ստանալու հույսեր: