Մենք չենք կարող դառնալ մի նոր ուկրաինա այս տարածքում. Մարտիրոսյան
ՆերքաղաքականԲանակցային գործի մասնագետ ԱՐԹՈՒՐ ՄԱՐՏԻՐՈՍՅԱՆԻ գնահատմամբ` Միացյալ Նահանգների եւ Եվրամիության այս ծավալի ուշադրությունը Հարավային Կովկասի նկատմամբ վտանգավոր է Հայաստանի համար, որը հայտնվել է ՌԴ եւ Արեւմուտք շահերի բախման կենտրոնում:
— Մենք չենք կարող դառնալ մի նոր Ուկրաինա այս տարածքում: ՌԴ-ն սկզբում բրյուսելյան հանդիպումներին ոչ այնքան քննադատորեն էր մոտենում, իրենք մտածում էին՝ հա, թող գնան խոսեն, միեւնույն է, բանալին մեր ձեռքում է, բայց հետո տեսան, որ սա կարող լուրջ լինել, տեսան ինչպես է հակառուսական մթնոլորտ ստեղծվում Հայաստանում, եւ այնպես չէ, որ դրան Ռուսաստանը չնպաստեց, բայց պարզ է, թե ինչպես եւ ինչ ուժերով, ով էր աշխատեցնում այդ հիստերիան: Եթե ստորագրվի պայմանագիր, որով Հայաստանն իրոք ճանաչում է Ադրբեջանի տարածքային ամբողջականությունը, եւ Արցախը ճանաչում է Ադրբեջանի մաս, սա վտանգավոր է ռուսների համար, որովհետեւ կասի՝ մենք ձեզ չենք հրավիրել, այս ժողովրդի անվտանգությունը մենք մեզ վրա ենք վերցնում, դուք ի՞նչ գործ ունեք այստեղ: Իսկ Ռուսաստանն այլ շահեր եւ պատկերացում ունի այս տարածաշրջանում, եւ եթե անգամ ասում են՝ արջը (Ռուսաստանը) վիրավոր է, միեւնույն է, արջը մնում է արջ, եւ թաթով կարող է այնպես հասցնել Հայաստանին, որ տեղի ունենա այն, ինչ տեղի ունեցավ 90-ականների սկզբում, երբ Լեւոն Տեր-Պետրոսյանը նույն ձեւ հակակայսրության պայքար էր տանում եւ այլն: Մենք տեսանք ինչի դա բերեց: Շատերը մոռացել են, թե ինչ էր տեղի ունենում 1991 թվականի մարտ ամսին եւ ինչպիսին էր մեր վիճակը, եթե չլիներ այդ հեղաշրջում կոչենք, թե հեղափոխություն՝ օգոստոսի 15-ին, ինչ քայլերի էր պատրաստ գնալ Լեւոն Տեր-Պետրոսյանը: Մեր իշխանություններն, ինձ թվում է, հասկանում են այդ պահերը, ուղղակի տարված էին այն բանով, թե Ռուսաստանի օրերը հաշված են, պարտվելու են եւ այլն, եւ եթե այդպես է, ուրեմն` իրենք արագացրեցին այդ ընթացքը, այլընտրանքային խաղ սկսեցին, բայց այդ խաղը խաղալու համար դու պետք է վստահ լինես, որ դու ունես զսպող էլեմենտ այդ խաղում:
ՀՐԱՆՏ ՍԱՐԱՖՅԱՆ