Որկրամոլության պատճառով մոռացել ենք Սուրբ Ծննդյան տոնի մասին.ԱՆՆԱ ՄԱՅԻԼՅԱՆ

«Իրավունքը» զրուցել է ՀՀ վաստակավոր արտիստ, երգչուհի (սոպրանո), միջազգային մրցույթների դափնեկիր ԱՆՆԱ ՄԱՅԻԼՅԱՆԻ հետ:

— Ձեր գնահատմամբ՝ հայ երգարվեստն այսօր ի՞նչ վիճակում է:

— Հայ երգարվեստ հասկացությունը ներառում է մի քանի տեսակներ: Ես ներկայացնում եմ հայ դասական եւ ազգային ոլորտը: Այստեղ, ինչպես միշտ, կան չլուծված հարցեր, անպաշտպան կատարողների իրավունքներ, կազմակերպիչների բացակայություն, «եղունգ ունես գլուխդ քորի» կարգախոս:

— Ի՞նչ կարծիք ունեք «Մանկական Եվրատեսիլի» մեր մասնակցի եւ ընտրված երգի մասին:

— Չեմ հետաքրքրվում այդ ոչ պրոֆեսիոնալ մրցույթով: Բացարձակ չգիտեմ՝ ով է մասնակցում եւ ինչ է երգում: Կարծում եմ՝ անիմաստ մրցույթ է եւ ֆինանսները, որոնք անիմաստ կերպով ծախսվում են այդ մրցույթին մասնակցելու համար, կարող են օգտագործվել ռազմական նպատակներով:

— Համացանցը ողողված է լուսանկարներով, որտեղ Հանրապետության հրապարակի` պետության կողմից հատուկ պահպանվող հուշարձաններ համարվող շենքերի վրա մեխեր են ցցված: Ինչպե՞ս եք վերաբերվում տեղի ունեցածին: Արդյո՞ք ճիշտ է եվրոպացիներին ուրախացնելու համար՝ ծակել պատմամշակութային արժեք ներկայացնող շենքերի պատերը:

— Եվրոպացիներին ծիծաղեցնելու համար՝ այո, կարելի է: Եվրոպացիները վաղուց արդեն հեռու են անիմաստ պճնանքներից: Եվրոպացիները երբեք չեն փչացնի սեփական պատմական հուշարձանն անիմաստ լույսերի համար: Եվրոպացին անում է ամեն ինչ, որ նույնիսկ ամենափոքր քարը, որը ընկել է պատմական շենքից, աշխատում է նույնությամբ վերադարձնել իր տեղը: Շատ բան ունենք սովորելու եվրոպացիներից:

— Ի վերջո, մենք լույսերո՞վ ենք ներկայանում, թե՞ մեր երգով…

— Եթե «Եվրատեսիլը»  նկատի ունեք, իհարկե՝ երգով: Եթե ընդհանրապես  նկատի ունեք աշխարհին ներկայանալու մասին, ապա մենք շատ բան ունենք ներկայացնելու, բայց այդտեղ պետք է աշխատի հմուտ դիվանագիտական, պատմագիտական, մշակութաբանական եւ ուղղակի հայրենասեր մասնագետների խումբ: Վաղուց արդեն պետք է դա արվեր:

— Ըստ Ձեզ, ճի՞շտ  որոշում է, երբ 200-ից ավել զոհ ունեցանք սեպտեմբերին ու այդպես էլ սուգ չհայտարարվեց Հայաստանում, հիմա այսպես շքեղ Նոր տարի նշել:

— Նախ չպետք է թույլ տրվեր այդ սպանդը: Պետք է գոնե հիմա այնպես անենք, որ ապագայում նման բան չկրկնվի: Պետք է ուշքի գանք եւ այն աստիճանի ռազմական ուժ ունենանք, որ թշնամին երբեք չկարողանա ոտնձգություն անել: Բայց մենք շարունակում ենք դրա մասին չմտածել:

Նոր տարի անելը յուրաքանչյուրի գործն է: Բնական է, փոքրիկների համար է մեծ մասամբ դա ուրախություն: Բայց այն, իհարկե, սովորական մի տոն է: Ավելի կարեւոր է Սուրբ Ծննդյան տոնը, որի մասին որկրամոլության պատճառով մոռացել ենք: Նոր տարվա օրերը Պահքի օրեր են, այլ ոչ թե սեղանների: Սեղաններ էլի կարելի է գցել, բայց դրանք պետք է լինեն պահքային: Եթե մեր ժողովուրդը հետեւի ազգային ավանդույթներին, կառողջանա: Նման սեղաններին պետք է լինի միայն բուսական ծագում ունեցող կերակրատեսակներ: Պետք է վերադառնանք մեր ավանդույթներին՝ ավելի կարեւորություն տալով Սուրբ Ծննդյան հրաշքին:

— Ստեղծված իրավիճակից դուրս գալու համար կա՞ն լուծումներ:

— Աշխարհի «մեծերը» այնպիսի քաղաքական խճանկար են ստեղծել իրենց եւ մեզ համար, որ այդ լաբիրինթոսից դուրս գալը շատ բարդ է լինելու: Ես կարող եմ միայն մի բան ասել ՝ մենք ունենք մեծ եւ հզոր հովանավոր ՝ Աստծուն: Եթե մենք ուշքի գանք եւ դառնանք առ Աստված, վերադառնանք մեր ավանդույթներին, զորացնենք մեր ազգայինը եւ առաջ բերենք մեր երկրի համար հոգեւոր եւ աշխարհիկ կարեւորությունները, եթե մի կողմ դնենք կուսակցական տարաձայնությունները, եթե մարդկային «ես»-ի ունայնությունը փոխարինենք պետական ընդհանուր մտածելակերպով, ամեն բան կփոխվի:

 ՆՈՒՆԵ ԶԱՔԱՐՅԱՆ

Այս թեմայով Հայ ժողովրդին ստրկացնելու նպատակ ունեցող Նիկոլին միասնական պիտի հեռացնենք. Աննա Մկրտչյան Փաշինյանը 2018-ին սպանել է Հայաստանի պետականությունը. Աննա Մկրտչյան Դա դժբախտ կանանց ցուցադրություն էր. Լարիսա Ալավերդյան Պատգամավորները երաշխավորություն են ներկայացնում՝ Աշոտյանի խափանման միջոց կալանքը փոխելու համար Ելույթս թիրախին խփել է, տեղ է հասել... Ալեն Սիմոնյանը հանձնարարական էր ստացել. Աննա Մկրտչյան