Պասիվություն, պոպուլիզմ. ինչպիսին էր նախընտրական քարոզարշավի մեկնարկը

«Ժողովրդի ձայնը» փորձագիտական ակումբը Երեւանի ավագանու ընտրություններին ընդառաջ մոնիթորինգ է իրականացրել, նվիրված քարոզարշավի մեկնարկին ու քաղաքական ուժերի ստարտային հնարավորություններին: Մոնիթորինգի արդյունքները ներկայացնում ենք ստորեւ:

Ըստ այդմ, փորձագիտական ակումբի ֆոկուս խմբերն արձանագրել են, որ նախընտրական քարոզարշավի մեկնարկը բավականին պասիվ է տրվել, ընտրություններին մասնակցության հայտ ներկայացրած քաղաքական ուժերի միջեւ ընտրապայքարը դեռեւս այդքան էլ դինամիկ ընթացք չունի: Նախընտրական քարոզարշավի առաջին շաբաթվա ընթացքում ակնհայտ է ոչ միայն ուժերի, այլեւ երւանցիների պասիվությունը: Փորձագետներն արձանագրում են, որ ըստ քարոզարշավի առաջին շաբաթվա արդյունքների՝ քաղաքական ուժերը դեռեւս չեն կարողացել գրավել երեւանցիների հետաքրքրությունն ու իրենց օրակարգով գրավել նրանց ուշադրությունը:

Քաղաքական ուժերն էլ, կարծես, ջանք չեն գործադրում այդ պասիվ հետաքրքրությունը կոտրելու, ակտիվացնելու քաղաքական գործընթացը: Որոշ ուժեր փորձում են արտաքին քաղաքական աստառ տալ երեւանյան գալիք ընտրություններին, անգամ հակառուսական տրամադրություններ գեներացնել, օրինակ՝ Տիգրան Խզմալյանը քարոզարշավն անցկացնում ԵՄ դրոշով, իսկ «Հանրապետություն» կուսակցության առաջնորդ Արամ Սարգսյանը քարոզարշավի ընթացքում դարձյալ բարձրաձայնում է ՀՀ-ի՝ ՀԱՊԿ-ից դուրս գալու հարցը: Որպես նրանց հակակշիռ, օրինակ, «Հանուն սոցիալական արդարության» կուսակցությունը ներկայանում է որպես հայ-ռուսական հարաբերությունների զարգացման ու ամրապնդման ջատագով:

Մոնիթորինգ իրականացրած փորձագետները նշում են, որ ծրագրային առումով քաղաքական ուժերի մեծ մասի մոտ գերակշռում է պոպուլիզմը, իրական խնդիրները չեն արտացոլվում եւ երեւանցիներին չեն ներկայացվում նրանց հուզող խնդիրների լուծումները, փոխարենը այլընտրանքային իրականություն է հրամցվում՝ դժվար իրականացվելիք ծրագրերով:

Այդպես, իշխանության թեկնածուն խոստանում է ամեն տարի մետրոյի նոր կայարան բացել, մեկ այլ թեկնածու խոսում է տրանսպորտն անվճար դարձնելու մասին եւ նմանատիպ այլ խոստումներ են հնչում: Մինչդեռ, ինչպես վկայում են «Ժողովրդի ձայնը» փորձագիտական ակումբի հարցումները երեւանցիների շրջանում, նրանց հետաքրքրում են այնպիսի խնդիրների լուծումներ, ինչպիսիք են ջրամատակարարումը, աղբահանությունը, Երեւանի օդի աննախադեպ աղտոտվածության մակարդակն ու դրա դեմն առնելու ուղիները, փողոցների բեռնաթափումը, տրանսպորտի խնդիրը եւ այլն: Նաեւ երեւանցիներին շատ հետաքրքրում է առողջապահական ոլորտին առնչվող հարցերը, մանկապարտեզների խնդիրը, քանզի ոչ բոլոր երեխաներն են կարողանում հաճախել պետական մանկապարտեզներ անգամ տարիներով հերթագրված լինելու պարագայում: Այս հարցերն են, որ առաջնային նշում են երեւանցիները հարցումների ժամանակ:

«Ժողովրդի ձայնը» փորձագիտական ակումբի ֆոկուս խմբերը Երեւանի ավագանու նախընտրական քարոզարշավի ընթացքում կշարունակեն հետեւել թե՛ քաղաքական ուժերի կողմից իրականացվող ընտրական կամպանիայի ընթացքին, թե՛ երեւանցիների տրամադրություններին՝ հասկանալու, թե սեպտեմբերի 17-ին ինչ ընտրություն են կատարելու մայրաքաղաքի բնակիչները:

Հարցումներն իրականացվել են Երեւանի վարչական բոլոր շրջաններում, շուրջ 1200 երեւանցիների շրջանում:

Այս թեմայով Հնարավոր չէ 2018-ի սցենարով իշխանափոխություն անել. Արման Ղուկասյան Գործող իշխանության քայլերը խաղաղության չեն կարող բերել. Արման Ղուկասյան Խնդիրների հաղթահարման գործում շատ կարեւոր է նաեւ երիտասարդության դերը. Արման Ղուկասյան Ո՞ւր է տանում Նիկոլ Փաշինյանի հակառուսական քաղաքականությունը. Արման Ղուկասյան Հանրայինի եթերում հիմնական բանախոսները շարունակում են մնալ արեւմտամետ գործիչները. ինչ են ցույց տալիս մոնիթորինգի արդյունքները