Политик, которого нет
ՆերքաղաքականԱյնպես, ինչպես որոշ քաղաքական ուժեր են փորձում փրկել հայ ժողովրդին, մնում է հաստատապես պնդել, որ դեպի անդունդ մեր գահավիժումն այլընտրանք չունի: Այո՛, ինչպես կասեր «Ուժը Հայրենյաց» կուսակցության նախագահ ՏԻԳՐԱՆ ԱՐԶԱՔԱՆՑՅԱՆԸ՝ որեւէ մեկը չի կարող մեր «անդունդը խանգարել»: Ասվածի վառ ապացույցն է հենց Տիգրան Արզաքանցյանի վերջերս կատարած այցը Մոսկվա: Հենց Կարմիր հրապարակից ստալինյան ինքնավստահությամբ՝ Արզաքանցյան Տիգրանն ազդարարեց, որ որդիների հետ գտնվում է ՌԴ-ում եւ սոցցանցում իր ուղիղ եթերով զգուշացրեց. «Այցն ինքնանպատակ չէ»:
Եվ մինչ հանրությունը քիչ էր մնում շունչը պահած սպասեր, որ հիմա-հիմա «Ուժը Հայրենյաց» գործի կդնի Տիգրան Արզաքանցյանն ու Պետդումայում կբարձրացնի հայկական հարցը, նա հայտնվեց ընդամենը Պետդումայի դիմացի մայթում: Ինչպես, երեւի թե, արդեն գուշակեցիք, Տիգրան Արզաքանցյանին հաջողվել էր ընդամենն այցելել Պետդումայի ուղիղ դեմուդեմ գտնվող «Страна, которой нет» ռեստորան: Սա քաղաքական կուլիսներում իսկական անեկդոտ է դարձել, ասում են՝ политик, которого нет, հայտնվել է в стране, которой нет: Ի դեպ, այս հարցում ընդդիմությունն ու իշխանությունը լրիվ ներդաշնակ են, երկուսին էլ ուրախացնում է Տիգրան Արզաքանցյանը:
Այդուհանդերձ, Տիգրան Արզաքանցյանին հաջողվեց գոնե մի պաշտոնական հանդիպում ունենալ Մոսկվայում: Նա առանձնազրույց է ունեցել Ռուսաստանի հայերի միության նախագահ Արա Աբրահամյանի հետ: Չար լեզուներն ասում են, որ առանձնազրույցը գաղտնալսել փորձողներն ուղղակի «կանտուզիա» են ստացել՝ հաշվի առնելով Արզաքանցյանի եւ Աբրահամյանի ինչպես հայերենի, այնպես էլ ռուսերենի իմացությունը: Բայց մի շտապեք կարծիք կազմել այս հանդիպման վերաբերյալ, պարոնայք այդ հարցը հոգացել են ու հաղորդագրություն տարածել: Իզուր չէինք ասում, թե Արզաքանցյանը հայկական հարցի համար է գնացել Մոսկվա: Այսպիսով՝ ըստ պաշտոնական հաղորդագրության, կողմերն անդրադարձ են կատարել նաեւ Հայկական հարցին ու Հայաստանի անվտանգային համակարգին: Ախր ինչպես չէր գլխի ընկել ժամանակին Խրիմյան Հայրիկը, որ Հայկական հարցը լուծելու հույսով ոչ թե պետք է գնալ, օրինակ, Բեռլինի վեհաժողով, այլ ռուսաստաններում հարստացած մի գործարարի մոտ, չէ՞ որ այնտեղ շերեփը ոչ թե թղթից կլիներ, այլ՝ ոսկեզօծ: Իհարկե, հումորը հումոր, բայց սա նաեւ ողբերգություն է, երբ երկրի համար օրհասական պահին ժողովուրդը կերակրվում է դեռ ճռճռան ուղիղ եթերներով ու «Я русский школ скончалься» ռուսերենի իմացությամբ հայկական հարց լուծողների խոստումներով: Ընդ որում՝ այն դեպքում, երբ Տիգրան Արզաքանցյանը նույնիսկ չի կարողացել իր ուսման հարցը լուծել Մոսկվայում, եւ արտահերթ խորհրդարանական ընտրությունների ժամանակ կրթության մասին փաստաթղթերը կեղծելու դեպքի առթիվ գործ հարուցվեց նրա դեմ: Նա ներկայացրել էր, թե Մոսկվայի տեղեկատվատեխնոլոգիական համալսարան-Մոսկվայի ճարտարապետաշինարարական ինստիտուտում ուսումնառել է 2018 թվականից մինչեւ 2019 թվականն ընկած ժամանակահատվածում՝ այդկերպ օգտագործելով կեղծ փաստաթուղթ: Բայց դե հիմա ո՞վ է հիշում Արզաքանցյանի «մութ կրթական պատմությունը», չէ՞ որ նա դեռ կուսակցությունը չգրանցած, բայց արդեն տեղ էր գտել Նիկոլ Փաշինյանի գրպանային արտախորհրդարանական ուժերի կլոր սեղանի շուրջ: Ի դեպ, ասում են, թե հայկական հարցով այս օրերին զբաղված Տիգրան Արզաքանցյանը չի կարողանում լուծել նաեւ իր աշխատողներին ժամանակին աշխատավարձ վճարելու հարցը, մինչդեռ ընտանեկան «վոյաժների» համար միշտ գումար գտնվում է:
ՀՐԱՆՏ ՍԱՐԱՖՅԱՆ