Կոնստանտին Օրբելյանի եւ Լիպարիտ Ավետիսյանի ստեղծագործական համագործակցությունը շարունակվում է

Աշխարհահռչակ հայազգի դիրիժոր, Նյու Յորքի քաղաքային օպերայի երաժշտական տնօրեն եւ գլխավոր դիրիժոր Կոնստանտին Օրբելյանի ղեկավարությամբ Կաունասի սիմֆոնիկ նվագախումբը «Delos Music» նշանավոր ընկերության կողմից ձայնագրել է 20-րդ հոբելյանական ալբոմը, որում ներառված են տենորի համար գրված 13 նշանավոր արիաներ հայ տաղանդաշատ օպերային երգիչ Լիպարիտ Ավետիսյանի մասնակցությամբ։ Սա Լ. Ավետիսյանի առաջին անհատական ալբոմն է, որի ձայնագրման առաջարկը դեռեւս տարիներ առաջ արվել է մաեստրո Կոնստանտին Օրբելյանի կողմից։

Լիպարիտ Ավետիսյանը կարեւորելով համագործակցությունը Կ. Օրբելյանի հետ՝ նշեց. «Այս ձայնագրության մտահղացումը մաեստրո Օրբելյաննին էր, եւ մենք պլանավորել էիք դեռ չորս տարի առաջ այն իրագործել, բայց հայտնի պատճառներով՝ պատերազմ, համավարակ, այնուհետեւ իմ զբաղվածության պատճառով չէր հաջողվում գոնե հինգ օր ազատ ժամանակ ունենալ, որպեսզի հանդիպեինք Կաունասում եւ իրականացնեինք ձայնագրությունը։ Այս տարի, բարեբախտաբար, հաջողվեց։ Ձայնագրության համար հատկացրել էինք չորս օր, սակայն ավարտեցինք երեք օրում։ Ձայնագրել ենք տենորի համար գրված 13 հայտնի արիաներ, գրեթե բոլոր արիաներն էլ իմ խաղացանկից են, այսինքն՝ բոլոր այդ դերերով ես ներկայանում եմ աշխարհի տարբեր բեմերում»։

Լիպարիտ Ավետիսյանը սովորել է Մոսկվայի Պ. Չայկովսկու անվան պետական կոնսերվատորիայում Բ.Կուդրյավցևի դասարանում: Այնուհետեւ ուսումը շարունակել է Երեւանի Կոմիտասի անվան պետական կոնսերվատորիայում` պրոֆեսոր Ռաֆայել Հակոբյանցի դասարանում: Ներկայումս արտիստը հանդես է գալիս աշխարհի հեղինակավոր օպերային թատրոններում։

«Նախ պետք է ասեմ, որ անչափ կարոտել էի մաեստրո Օրբելյանին։ Շատ ուրախ եւ հպարտ եմ, որ ճանաչում եմ նրան։ Մաեստրո Օրբելյանն ինձ համար ավագ եղբայր է, ընկեր, ում խորհուրդնեը մշտապես շատ կարեւոր են ինձ համար։ Այն դրական ու ջերմ մթնոլորտը, որ կարողանում է մշտապես ստեղծել մաեստրոն եւ այդ էներգետիկան փոխանցել շրջապատին գլխավոր գրավականն է հանդիսանում այսպիսի մեծածավալ նախագծերը դյուրությամբ իրագործելու համար։ Հուսով եմ, որ առաջիկայում մենք նոր ու հետաքրքիր համատեղ նախագծերով հանդես կգանք»,- նշեց իր խոսքում Լիպարիտ Ավետիսյանը։

Կաունասի սիմֆոնիկ նվագախմբի մասնակցությամբ (դիրիժոր Կոնստանտին Օրբելյան) տեղի է ունեցել նաեւ Լիպարիտ Ավետիսյանի եւ ամերիկացի օպերային երգչուհի Քրիստին Սամփսոնի համատեղ համերգը։ Համերգային երեկոն արժանացել է հանդիսատեսի բարձր գնահատականին։

Այս թեմայով Հայեր ջան, էրթանք Հայաստան. Հայկ Կասպարով (Պրեմիերա) Գետը չտեսած բոբիկանալը անտեղի է, ոգևորությունը՝ նույնպես. Հովհաննես Ավետիսյան Ես կգամ. Վահագ Ռաշը նյարդերը հանգստացնող նոր դեղատոմս է առաջարկում Բոլոր հնարավոր առիթներով փորձում եմ ակտիվ պահել իմ կապը Հայրենիքիս հետ. Կոնստանտին Օրբելյան Կոնսերվատորիան բուհ չէ, այլ երաժշտի տունն է, ի վերջո, Կոմիտասի տունն է. Վարդան Խաչատրյան