ԿԱՐՃ ԼՈՒՐԵՐ

ԻՆՉ ԷՐ ԳՐՈՒՄ «ԻՐԱՎՈՒՆՔԸ» 1 ՏԱՐԻ ԱՌԱՋ

08.09.2018 15:58 ՌԵՏՐՈ
ԻՆՉ ԷՐ ԳՐՈՒՄ «ԻՐԱՎՈՒՆՔԸ» 1 ՏԱՐԻ ԱՌԱՋ

ԵԱՏՄ-ից դուրս գալու «Ելքի» առաջարկի վերաբերյալ Սասուն Միքայելյանը հորդորում է չշտապել

08.09.2017  ՕՐՎԱ ՊԱՏԿԵՐ ՔԱՂԱՔԱԿԱՆ ԹԵՄԱ

ՌԵՏՐՈ. ԻՆՉ ԷՐ ԳՐՈՒՄ «ԻՐԱՎՈՒՆՔԸ» 1 ՏԱՐԻ ԱՌԱՋ

Այս շաբաթ ԱԺ պաշտպանության եւ անվտանգության հարցերի մշտական հանձնաժողովը մի շարք այլ հարցերի կողքին դրական եզրակացություն տվեց «ՀՀ-ի եւ ՌԴ-ի միջեւ` Հայաստանի Հանրապետության զինված ուժերի եւ Ռուսաստանի Դաշնության զինված ուժերի զորքերի (ուժերի) միացյալ խմբավորման մասին» համաձայնագիրը վավերացնելու օրինագծին, որը կընդգրկվի ՀՀ ԱԺ նստաշրջանի առաջիկա օրակարգում: Բավական երկար տեւած քննարկումից հետո հանձնաժողովի անդամներից միայն մեկը դեմ քվեարկեց այս օրինագծին` ո՛չ ավել, ո՛չ պակաս, ազատամարտիկ, ԱԺ «Ելք» խմբակցության պատգամավոր ՍԱՍՈՒՆ ՄԻՔԱՅԵԼՅԱՆԸ: Իսկ թե ինչի՞ն էր դեմ պատերազմի բովով անցած ընդդիմադիր պատգամավորը, «Իրավունքը» հետաքրքրվեց նրանից: 

ԱՆՎՏԱՆԳՈՒԹՅԱՆ ԱՅԼԸՆՏՐԱՆՔՍ ԳԱՂՏՆԻ ԹՈՂ ՄՆԱ

– Պարոն Միքայելյան, ՌԴ Պետական դուման մոտ մեկ ամիս առաջ, ընդ որում` միաձայն, վավերացրեց հայ-ռուսական միացյալ զորախումբ ստեղծելու մասին համաձայնագիրը: Ինչպե՞ս կբացատրեք նախագծին Ձեր «դեմ» քվեարկելը:

– Մենք առանձին պետություն ենք, ի՞նչ կապ ունի... Պետք է հանդես գանք որպես դաշնակից, ոչ թե պետդուման ինչ ընդունի, ինչ անի` մենք էլ անենք:

– Իսկ տեսնո՞ւմ եք մեկ այլ անվտանգության հավելյալ երաշխիք, քան հայ-ռուսական զորախումբը կարող է լինել: 

– Անվտանգության այլընտրանք միշտ էլ կա: 

– Օրինա՞կ...

– Հարցն այստեղ դա չէ, այլ այն, որ սա շատ վտանգավոր է նաեւ Ղարաբաղի հարցում, որովհետեւ վաղը կարող է հարձակվեն Ղարաբաղի վրա, եւ համաձայնագրի շրջանակներում չկարողանանք օգնել կամ ինչ-որ հատուկ նշանակության զենքով միջամտել` կանխելու համար:

ՊԱՇՏՊԱՆՈՒԹՅԱՆ ԵՎ ԱՆՎՏԱՆԳՈՒԹՅԱՆ ՀԱՐՑԵՐԻ ՀԱՆՁՆԱԺՈՂՈՎՈՒՄ ՀՐԴԵՀՆԵՐԻՑ «ԿՈՒՐՍԻ» ՉԵ՞Ն

– Ի դեպ, կանխելու մասին. բավական ուշագրավ էր, որ այդպես էլ ԱԺ պաշտպանության եւ անվտանգության հարցերի մշտական հանձնաժողովում, որի անդամ եք նաեւ Դուք, այդպես էլ քննարկման առարկա չդարձավ վերջին մեկ ամսվա ընթացքում տեղական դիվերսիայի նմանվող հրդեհների պատճառներն ու իրականացվող միջոցառումների բացթողումները: Ի՞նչ կասեք այս մասին:

– Պարզ ասեմ` առանց թաքցնելու, էդքան էլ կուրսի չեմ` այդ հարցի հետ կապված, չեմ կարող պատասխանել այդ հարցին:

«ՇՏԱՊՈՒՄ ԵՆՔ, ՈՐ ԷՍ ՕՐՆ ԵՆՔ ԸՆԿԵԼ»

– Անդրադառնանք նաեւ «Ելքի» որոշ պատգամավորների կողմից Հայաստանի` ԵԱՏՄ-ից դուրս գալու առաջարկին: Հետաքրքիր է` Դուք ե՞ւս այն համարում եք օրակարգային:

ԻՆՉ ԷՐ ԳՐՈՒՄ «ԻՐԱՎՈՒՆՔԸ» 1 ՏԱՐԻ ԱՌԱՋ

– Մեր մոտ քննարկումներ են լինելու, հետագայում կիմանաք:

– Ամեն դեպքում, Ձեր անձնական տեսակետն այս հարցում ինչպիսի՞ն է:

– Իմ տեսակետը կարտահայտեմ...

– Հիմա չունե՞ք տեսակետ:

– Ո՞նց չունեմ, բայց որ քննարկումներ են գնում, ես հո չեմ ուզում առաջ ընկնեմ: Իսկ տեսակետ հստակ ունեմ, բայց հիմա չեմ արտահայտի:

– Գոնե կասե՞ք, թե հարցը քննարկման ո՞ր փուլում է:

– Մի՛ շտապեք, շտապում ենք, որ էս օրն ենք ընկել: 

ՀՐԱՆՏ ՍԱՐԱՖՅԱՆ

 

«Մենք «ԵՎ-ԵՎ»-ի կողմնակից ենք, բայց այդ «ԵՎ»-երը հավասար լինել չեն կարող»

08.09.2017  ՔԱՂԱՔԱԿԱՆ

«Մենք «ԵՎ-ԵՎ»-ի կողմնակից ենք, բայց այդ «ԵՎ»-երը հավասար լինել չեն կարող»

 

«Այն անհիմն հայտարարությունները, թե իբր 2013 թվականի սեպտեմբերի 3-ին ԵԱՏՄ-ին անդամագրվելու Հայաստանի հայտարարությունը փչացրին մեր հարաբերությունները Եվրոպական միության հետ` էժանագին հնարք է»: Այսպիսի գնահատական է տվել ԱԺ ՀՀԿ խմբակցության պատգամավոր, ՍԻՄ նախագահ Հայկ Բաբուխանյանը` հանդես գալով սեպտեմբերի 4-ին «Արարատ» հեռուստաալիքով: 

«Մենք չենք փչացրել, չենք փորձել վանել ԵՄ-ին, հակառակը` մենք ամեն ինչ անում ենք, որպեսզի գործի «եւ-եւ»-ի բանաձեւը: Սա մեր պաշտոնական դիրքորոշումն է»,- ասել է Հ. Բաբուխանյանը, այնուհետ հավելել. «Բայց մենք պետք է հասկանանք, որ դրանք հավասար «եւ»-եր չեն: Հայաստանի համար Ռուսաստանը եւ Եվրամիությունը չեն կարող լինել հավասար: Նրանք կարող են լինել փոխլրացնող»: 

Ա. ՀԱԿՈԲՅԱՆ

Ինչպես ԿԳՆ-ն Հրազդանի քաղաքապետի որդուն կասկածյալից դարձրեց մեդալակիր

08.09.2017  ՕՐՎԱ ՊԱՏԿԵՐ ՔԱՂԱՔԱԿԱՆ ԹԵՄԱ

Ինչպես ԿԳՆ-ն Հրազդանի քաղաքապետի որդուն կասկածյալից դարձրեց մեդալակիր

Դեռեւս ամիսներ առաջ մամուլում լայն արձագանք գտավ այն, որ Հրազդանի քաղաքապետարանին պատկանող «Նիսսան Տիանա» մակնիշի 444 LL 70 համարանիշի ավտոմեքենան վրաերթի էր ենթարկել ճանապարհը հատող 58-ամյա հետիոտնի, որը մարմնական վնասվածքներով տեղափոխվել էր «Հրազդան ԲԿ» ՓԲԸ, որտեղ էլ գիտակցության չգալով` մահացավ: Մի շարք լրատվամիջոցներ պնդում էին, որ ղեկին եղած 17-ամյա երիտասարդը Հրազդանի քաղաքապետ Արամ Դանիելյանի որդին է եղել: Սակայն, քաղաքապետ հայրիկին, կարծես, հաջողվեց կոծկել այս պատմությունն ու արդարացնել որդուն: Ավելին` Գիտելիքի եւ դպրության օրվա առթիվ էլ 2016-2017 ուստարում բարձր առաջադիմություն ցուցաբերելու համար ոսկե մեդալով պարգեւատրված դպրոցականների թվում հայտնվեց ո՛չ ավել, ո՛չ պակաս քաղաքապետի սիրասուն որդին` Ռազմիկ Դանիելյանը: Այս պարադոքսի մասին, երեկ կառավարության նիստից հետո` փորձեցինք պարզել ՀՀ կրթության եւ գիտության նախարար ԼԵՎՈՆ ՄԿՐՏՉՅԱՆԻ տեսակետը.

ԻՆՉ ԷՐ ԳՐՈՒՄ «ԻՐԱՎՈՒՆՔԸ» 1 ՏԱՐԻ ԱՌԱՋ

– Մեդալ ստանալու համար ներկայացնում է դպրոցը, անցնում է համապատասխան ընթացակարգեր, աշակերտը 12 տարվա գիտելիքի արդյունքում է մեդալ ստանում: Խոսքը վերաբերում է երիտասարդի, անկախ նրանից, պաշտոնյայի երեխա է, պաշտոնյայի երեխա չէ: Նա ստանում է ոսկե մեդալ իր աշխատանքի հիման վրա: Ես հետաքրքրվել եմ, իսկապես, լավ սովորող երիտասարդ է, դպրոցից էլ կարող եք հետաքրքվել: Հիմա եթե եղել է դժբախտ դեպքը, ի՞նչ հիմքով իր ուսման, գիտելիքի համար նախատեսված պարգեւն իրեն չտրվի: Բոլորովին տարբեր խնդիրներ են: Դուք գիտեք, որ անգամ ազատազրկման մեջ գտնվող մարդիկ ունեն իրավունքներ, այդ թվում` կրթության: Եվ եթե արժանի է պարգեւի, պետք է ստանա: Իրար հետ մի խառնեք: Քրեական գործ հարուցված է, ընթացքով գնում է, բայց ինքը կարող է, օրինակ, լինել շատ բարձր սպորտսմեն: Մեդալը հե՞տ վերցնենք:

ՀՐԱՆՏ ՍԱՐԱՖՅԱՆ

Հ.Գ.- Իհարկե, կարելի էր արժանահավատ համարել ԿԳ նախարարի դիտարկումները եւ նույնիսկ հուզվել, բայց հիշեցնենք, որ թե՛ բուհերում, թե՛ դպրոցում ամենքիս հավատացնում էին, որ գնահատվում է նաեւ վարքը: Սակայն, Լ. Մկրտչյանի խոսքից կարելի է ենթադրել, որ վարքը գնահատվում է միայն այն դեպքում, եթե հայրդ քաղաքապետ չէ:

Առողջապահության փոխնախարարը վտանգավոր պատվաստմանն այլընտրանք չի տեսնում

08.09.2017  ՀԱՆՐՈՒԹՅՈՒՆ ԱՌՈՂՋԱՊԱՀԱԿԱՆ

 Առողջապահության փոխնախարարը վտանգավոր պատվաստմանն այլընտրանք չի տեսնում

Ընդամենն ամիսներ անց` դեկտեմբերից, Հայաստանում իրականացվելու են պապիլոմա վիրուսի դեմ պատվաստումներ` 13 տարեկան եւ դրանից բարձր տարիքային խմբի աղջիկներին` ամերիկյան Merck ընկերության «Գարդասիլ» պատվաստանյութերով: Վերջին օրերին այս պատվաստանյութի վտանգավոր հետեւանքների մասին, որոնք հիմնված են միջազգային աղաղակող փորձի վրա, բազմիցս բարձրաձայնվել է թե՛ մամուլում, թե՛ տարբեր պրոֆեսորների կողմից: Հիշեցնենք, որ վերոնշյալ պատվաստման հետեւանքով մարդկանց մոտ առաջացել են անպտղություն, վերարտադրողական ֆունկցիայի խանգարումներ, վիժումներ, մկանային ցնցումներ, նյարդային համակարգի խանգարումներ, արյան ճնշման փոփոխություններ, գլխացավեր, հոդացավեր եւ այլն: Թե արդյոք այս ամենը հաշվի առնելով` հայրենի Առողջապահության նախարարությունը չի պատրաստվում վերանայել Հայաստանում` այն էլ դեռահաս աղջիկների շրջանում, «Գարդասիլ» պատվաստանյութի կիրառումը, «Իրավունքը» հետաքրքրվեց առողջապահության փոխնախարար ՍԵՐԳԵՅ ԽԱՉԱՏՐՅԱՆԻՑ, որը հարցադրումից միանգամից բորբոքվեց:

ԻՆՉ ԷՐ ԳՐՈՒՄ «ԻՐԱՎՈՒՆՔԸ» 1 ՏԱՐԻ ԱՌԱՋ

– Մի՛ հավատացեք այդ ամենին:

– Ամեն դեպքում, եթե կան այդ պատվաստանյութերի վտանգավորությունը փաստող օրինակներ, չե՞ք պատրաստվում հավելյալ ուսումնասիրություն կատարել այս ուղղությամբ:

– Ո՛չ:

– Բայց միջազգային պրոֆեսորներն են անգամ բարձրաձայնում, որ այդ պատվաստումների կարիքը չկա (օրինակ` պապիլոմա վիրուսի «Գարդասիլ» պատվաստանյութի առաջատար հետազոտող, գինեկոլոգիական քաղցկեղի  կանխարգելման հետազոտական խմբի տնօրեն, հասարակական եւ ընտանեկան բժշկության, կենսաբժշկական եւ առողջապահական ինֆորմատիկայի, մանկաբարձության եւ գինեկոլոգիայի ԱՄՆ պրոֆեսոր Դայան Հարփերը):

– Ես ասացի իմ կարծիքը` ո՛չ: Մենք դրան այլընտրանք չենք տեսնում: Դա շատ արդյունավետ եւ միանշանակորեն ընդունվող ճանապարհ է` պայքարելու մի շարք հիվանդությունների դեմ:

– Իսկ ոչի՞նչ, որ «Գարդասիլ» պատվաստանյութի առաջացրած ծանր հետեւանքներից հետո Ճապոնիայի կառավարությունը հրաժարվել է պատվաստումներ կատարելու քարոզչությունից, իսկ ԱՄՆ կառավարության VAERS տվյալների բազայի համաձայն` գրանցվել է HPV պապիլոմա վիրուսի դեմ պատվաստանյութի կողմնակի ազդեցությունների ավելի քան 50 հազար դեպք...

– Չեն հրաժարվել:

– Պարոն Խաչատրյան, ես չեմ ասում, այլ արձանագրված փաստ է` Ճապոնիայի եւ ԱՄՆ-ի կառավարությունների կողմից:

– Դուք հիմա բացարձակ խեղաթյուրում եք...

Սա ասելով` առողջապահության փոխնախարարը խոսքը կիսատ թողած շտապեց փախչել հարցերից, հավանաբար հասկանալով, որ «Դուք հիմա բացարձակ խեղաթյուրում եք» արտահայտությունը կոնկրետ վիրավորում է Ճապոնիայի եւ ԱՄՆ-ի կառավարություններին, ինչը ամենեւին հարիր չէ պետական պաշտոնյային:

ՀՐԱՆՏ ՍԱՐԱՖՅԱՆ

 

«Պետք է ոչ թե մեղքեր վերագրել ԵԱՏՄ-ին, այլ մեղքը փնտրել մեզանում»

08.09.2017  ՔԱՂԱՔԱԿԱՆ ՀԱՆԴԻՊՈՒՄ

«Պետք է ոչ թե մեղքեր վերագրել ԵԱՏՄ-ին, այլ մեղքը փնտրել մեզանում»

Լրացավ 4-րդ տարին այն օրից, երբ ՀՀ նախագահ Սերժ Սարգսյանը Մոսկվայում հայտարարեց, որ Հայաստանը մտնելու է Մաքսային միություն եւ մասնակցելու է Եվրասիական տնտեսական միության (ԵԱՏՄ) ձեւավորման գործընթացին: Հիմա արդեն միությունը կայացած կառույց է, իսկ Հայաստանը` դրա մի մասնիկը: Սակայն այսօր այս կառույցից պտուղներ քաղելու փոխարեն, ԱԺ «Ելք» խմբակցությունն առաջարկում է դուրս գալ ԵԱՏՄ-ից, ինչը, ըստ նրանց, փորձելու են առաջիկայում բերել օրակարգ: Վերոնշյալի, ինչպես նաեւ մի շարք այլ հարցերի շուրջ «Իրավունքը»զրուցեց ԱԺ ընդդիմադիր «Ծառուկյան» դաշինք խմբակցության պատգամավոր ՍԵՐԳԵՅ ԲԱԳՐԱՏՅԱՆԻ հետ: Նրա գնահատմամբ` ցանկացած միության անդամակցում չի կարող միանգամից արդյունքներ տալ:

ԻՆՉ ԷՐ ԳՐՈՒՄ «ԻՐԱՎՈՒՆՔԸ» 2 ՏԱՐԻ ԱՌԱՋ

ԻՆՉՈՒ 170 ՄԻԼԻՈՆԱՆՈՑ ՇՈՒԿԱՅՈՒՄ ՉԵՆՔ ԿԱՐՈՂԱՆՈՒՄ ՀՍՏԱԿ ՏԵՂ ԱՄՐԱԳՐԵԼ

– Շատ ավելի արդյունքների պետք է սպասել երկարատեւ դիտարկման մեջ, եւ նույնիսկ ամենալավ միությունում, եթե մենք նախաձեռնողական քաղաքականությամբ հանդես չգանք, բնականաբար, կշահեն այն երկրները, ովքեր ավելի նախաձեռնող են, ովքեր կարողանում են ներկայացնել իրենց հանրության խնդիրները եւ հնարավորություններ ընձեռել` ընդհանուր շուկան օգտագործել ի շահ իրենց ժողովրդի: Այնպես որ, պետք է ոչ թե մեղքեր վերագրել ԵԱՏՄ-ին, այլ մեղքը փնտրել մեզանում: Եթե, օրինակ, որեւէ արտադրատեսակի արտադրությունը մոնոպոլիզացրել ենք, բնականաբար, այն չի կարող մրցակցային դառնալ ցանկացած շուկայում, այդ թվում եւ ԵԱՏՄ շուկայում: Այսինքն` նախ առաջին հերթին փնտրենք մեր կառավարման համակարգի մեջ թերացումները, որ այսօր չենք կարողանում այս 170 միլիոնանոց շուկայում որոշակի հստակ տեղ ամրագրել: Մենք թերացել ենք մեր ներքին տնտեսական հարաբերություններում, մենաշնորհել ենք տնտեսությունը եւ նրա պտուղները հիմա քաղում ենք: Այսօր շուկան բաց է, բայց  այն արտադրողները, որոնք ժամանակին պատրաստ էին նույն արտադրանքը արտադրել ավելի որակյալ, բազմերանգ, գեղեցիկ, այլեւս չկան, եւ մնացել է այն մեկը, որին հովանավորել է իշխանությունը, իսկ այս մեկն էլ մրցունակ չէ: Պետք է մրցակցության մեջ գտնվեր այն արտադրողը, որը այսօր ԵԱՏՄ-ում տեղ կունենար, մինչդեռ շատերն այլեւս այլ երկրներում են արտադրող, այլ երկրներ են շենացնում: Ամենահեշտը մեզնից դուրս մեղավորներ փնտրելն է, բայց իրական մեղավորները նախ մենք ենք` մեր կառավարման համակարգով եւ տարիների ընթացքում տնտեսական զարգացման հստակ տեսլական չունենալով: Սրանք բերեցին մեզ այս վիճակին, այլապես այսօր ԵԱՏՄ համակարգում առնվազն կարող էինք ունենալ 10 տոկոսանոց շուկա, որը կփրկեր մեր տնտեսությունը: Իսկ տնտեսությունը փրկել նշանակում է փրկել բոլոր ոլորտները` ե՛ւ սպորտը, ե՛ւ մշակույթը, ե՛ւ մնացյալը: Այսինքն` ԵԱՏՄ-Հայաստան փոխհարաբերության մեջ մեր մեղավորությունն ավելի շատ է: 

««ԵԼՔԸ» ՀԱՎԱՆԱԲԱՐ ԵԼՔ Է ՓՆՏՐՈՒՄ, ԲԱՅՑ ԱՅՆ ԺԱՄԱՆԱԿԱՎՐԵՊ Է»

– Պարոն Բագրատյան, իսկ որքանո՞վ եք ողջախոհ համարում, որ մեր մեջ մեղքերը փնտրելու փոխարեն, ԱԺ «Ելք» խմբակցությունն առաջարկում է դուրս գալ ԵԱՏՄ-ից: 

– «Ելքը» հավանաբար ելք է փնտրում, բայց այն ժամանակավրեպ է, չի՛ կարելի որեւէ գործընթաց անել ժամանակավորի հոգեբանությամբ: Եթե մենք անենք առավելագույնը եւ չստանանք ոչինչ, արդարացված կլիներ հիմնավորել եւ դուրս գալ այս միությունից, բայց այսօր մենք մեր պոտենցիալը չենք օգտագործել ԵԱՏՄ շրջանակներում, խնդիրներ չենք դրել եւ լուծել: Հետեւաբար, առավելագույնը չարած մեր երկրի, մեր ժողովրդի համար եւ ձեռքբերումները կիսատ թողած անցնել նոր իրավահարաբերությունների այլ միություններում, ճիշտ չէ: Ես չգիտեմ մի միություն, որը հենց առաջին օրվանից որեւէ անդամ պետության համար ստեղծում է իդեալական պայմաններ, բոլորն էլ նախեւառաջ պահանջներ են դնում, նոր հետո իրավունքներ են տալիս: Մենք պատրա՞ստ ենք որեւէ այլ միության մեջ այսօր ինտեգրվելու, ռեա՞լ է, հաշվարկվա՞ծ է, կա՞ն թվեր... Եթե կբերեն, կապացուցեն, կհիմնավորեն, մենք էլ կտեսնենք, որ իսկապես կա նման հնարավորություն, ինչո՞ւ չքննարկել, բայց այս պահին մենք սեղանին չունենք այդ վերլուծությունը եւ շտապել, ինչ-որ մի բան չստեղծած անցնել հաջորդ միությանը, չեմ կարծում` ողջամիտ է:

ԻՆՉ ԷՐ ԳՐՈՒՄ «ԻՐԱՎՈՒՆՔԸ» 1 ՏԱՐԻ ԱՌԱՋ

«ՔՆՆԱԴԱՏՈՒԹՅՈՒՆՆ ԱՆՀԱՍՑԵԱԿԱՆ ՉՊԵՏՔ Է ԼԻՆԻ»

– Ի դեպ, վերջերս լայն արձագանք գտավ այն, որ «Ծառուկյան» դաշինքից առաջադրված պատգամավորի թեկնածու, բայց այդպես էլ խորհրդարան չանցած գործարար Հակոբ Հակոբյանը հայտարարել էր, թե դաշինքից ընտրված որոշ պատգամավորներ ԱԺ-ում լղոզված քաղաքականություն են վարում եւ անգործության են մատնվել: Ի՞նչ կասեք այս մասին:

– Միշտ ողջունում եմ ազատ մամուլն ու ազատ կամարտահայտման մարդու իրավունքը, որը շատ կարեւոր արժեք է, եւ չեմ ցանկանում որեւէ մեկին առանձնացնել: Մեր քաղաքացիները պետք է ակտիվ լինեն, բոլորս պետք է ակտիվ լինենք, եւ որեւէ մի հարցում պասիվ լինելը չի նպաստելու երկրի զարգացմանը: Ուստի` եթե այդ քննադատության մեջ առողջ ծիլեր կան, ինչո՞ւ չարվի այդ քննադատությունը, բայց պետք է այն հիմնավոր լինի: Եթե որեւէ մեկին քննադատում ենք կամ մեղադրում, պետք է նաեւ ելքեր ու լուծումներ առաջարկենք: Բայց երբ չես մատնանշում, թե դու կոնկրետ ինչ չես արել եւ զուտ քննադատում եմ, որ դու լավ չես աշխատում, այստեղ կարող է թյուրըմբռնում լինել եւ չարդարացված մեղադրանքներ: Ըստ իս, քննադատությունն անհասցեական չպետք է լինի: Եթե կա ասելիք, հստակ թիրախ, կա մարդ, որը իսկապես չի ցանկանում աշխատել կամ իր տեղում չէ, եւ եթե ազնիվ ես, պետք է ասել` ես գտնում եմ, որ այս մարդը չունի նման ընդունակություններ, կամ նա պետք է այլ տեղում լինի, ոչ թե` այս: Այս դեպքում ինձ համար հասկանալի կլինի եւ ձեր հարցին հստակ կպատասխանեմ: Մինչդեռ մամուլից տեղեկացել եմ անհասցե քննադատության մասին եւ հիմնավորում չեմ տեսել: 

«ԱՅՆՔԱՆ ՔԻՉ ԵՆ ԸՆՏԱՆԵԿԱՆ ԲՌՆՈՒԹՅԱՆ ԴԵՊՔԵՐԸ, ՈՐ ՆՈՒՅՆԻՍԿ ՔՆՆԱՐԿՄԱՆ ԷԼ ԵՆԹԱԿԱ ՉԵՆ»

– Անդրադառնանք նաեւ «Ընտանեկան բռնության» մասին օրենքին, որը Արեւմուտքի կողմից կրկին փորձում են պարտադրել մեզ: Ավելին` շուտով ԱԺ եվրաինտեգրման հանձնաժողովում որոշել են ինչ-որ ՀԿ-ների հետ քննարկել այս թեման: Դուք` որպես հայկական ավանդական ընտանեկան արժեքներ կրող անձ, ինչպե՞ս եք վերաբերվում դրան:

– Ընտանիքը հասարակության հայելին է. միգուցե սա չարչրկված խոսք է, բայց իր մեջ լուրջ փիլիսոփայություն ունի: Բոլորս էլ մեր ընտանիքներում հայեցի դաստիարակություն ենք ստացել, որտեղ այլ արժեհամակարգ է դրված, քան եվրոպական ընտանեկան ավանդույթներն են: Եվ որեւէ մեկը իրավունք չունի ասել` որն է լավը, որը` վատը, սա մերն է, մենք հայ ենք եւ այս դաստիարակությամբ ապրել ենք դարեր: Կարծես թե, մեր զավակները երբեւէ չեն թերացել իրենց պարտականությունների մեջ, ավելին` ե՛ւ հայ ծնողներն են զավակապաշտ, ե՛ւ զավակներն են ծնողասեր: Պատահական չէ, որ, երեւի, ամենաքիչ լքված ծերերը Հայաստանում են, կարող եք համեմատել ցանկացած երկրի հետ, ու ամենաքիչ որբ մանուկները հայաստանյան մանկատներում են: Սրանք են այն արժեքները, որոնք փաստում են, որ, համենայնդեպս, սխալ ուղղությամբ չենք ընթացել: Եվրոպացիներն էլ իրավունք ունեն իրենց ընտանեկան ավանդույթները աշխարհին ներկայացնելու, բայց ցանկացած օրենսդրական նախագիծ կարող է կյանքի կոչվել, եթե դա տվյալ ժողովրդի, տվյալ երկրի շահերից ու ավանդույթներից է բխում: Իսկ առանց դրա, ցանկացած օրենսդրություն դատապարտված է: Ինչ վերաբերում է ընտանեկան բռնություններին, հայ ընտանիքը այն եզակի մշակույթն է, որտեղ իսկապես բռնություն չկա, որտեղ ավելի շատ հարգանքն է գերակայում: Այնքան քիչ են ընտանեկան բռնության դեպքերը, որ նույնիսկ քննարկման էլ ենթակա չեն:

ԻՆՉ ԷՐ ԳՐՈՒՄ «ԻՐԱՎՈՒՆՔԸ» 1 ՏԱՐԻ ԱՌԱՋ

– Այս դեպքում արհեստածին չէ՞ քննարկել եւ վաղն էլ «Ընտանեկան բռնության» մասին մի օրենսդրական նախաձեռնություն հրամցնել խորհրդարանին: 

– Եթե ինչ-որ ձեւով այն հակասելու է մեր ընտանեկան արժեքներին, իհարկե, արհեստածին է: Մենք չենք թերացել այս հարցում, որ ցանկանանք անպայման փոփոխություն մտցնել այստեղ: Դրա փոխարեն շատ այլ աշխատանքներ ունենք, որտեղ թերացել ենք եւ այդ թերացումներով վնասել ենք նաեւ ընտանիքին ու ընտանիքի անդամների փոխհարաբերություններին: Օրինակ, երկրի սոցիալական իրավիճակով պայմանավորված` հայ տղամարդը, որը ընտանիքի գլխավոր կերպարն է, այսօր շատ է թուլացել, ինչը վտանգավոր է եւ վնաս է մեր ավանդական ընտանիքը պահելուն: Ըստ էության, ստացվում է, որ սոցիալականը վնասեց նաեւ ընտանիքներին: Այս մասին պետք է մտածել, բայց վերցնել ինչ-որ եվրոպական օրենք եւ նույնությամբ կիրառել այստեղ, ուղղակի, անթույլատրելի է:

ՀՐԱՆՏ ՍԱՐԱՖՅԱՆ

 

«չեմ հասկանում` Հակոբ Հակոբյանը դրանով ի՞նչ է ուզում ասել»

08.09.2017  ՔԱՂԱՔԱԿԱՆ

«չեմ հասկանում` Հակոբ Հակոբյանը դրանով ի՞նչ է ուզում ասել»


Վերջերս Հակոբ Հակոբյանը` Ճոյտը, ով ապրիլին կայացած խորհրդարանական ընտրություններում իր թեկնածությունն էր առաջադրել «Ծառուկյան դաշինքով» եւ չէր ընտրվել, իր հարզացրույցներից մեկում ասել էր, որ «Ծառուկյան դաշինքի» պատգամավորները խորհրդարանում զբաղվում են լղոզված քաղաքականությամբ: Ավելին, նա անգամ մուլտֆիլմ է նկարել` որոշ պատգամավորներին վերաբերող: «Իրավունքի» հետ զրույցում Հակոբ Հակոբյանը անդրադառնալով այս հայտարարությանը, տեղեկացրեց, որ «Ծառուկյան դաշինքը» նախընտրական շրջանում իր ընտրողներին ներկայացրել է 15 կետից բաղկացած ծրագիր, բայց խորհրդարան անցնելուց հետո որեւէ պատգամավոր այդ ծրագրի մասին չի հիշատակում:
«Ծառուկյան դաշինքի» պատգամավոր ՎԱՀԱՆ ԿԱՐԱՊԵՏՅԱՆԸ (Չերիի Վահանը) հակադարձում է Հակոբ Հակոբյանին. «Խորհրդարանի նստաշրջանը նոր պետք է մեկնարկի, չեմ հասկանում` Հակոբ Հակոբյանը դրանով ի՞նչ է ուզում ասել»,- «Իրավունքի» հետ զրույցում նշեց պատգամավորը:
– Գուցե, Հակոբ Հակոբյանը «Ծառուկյան դաշինքից» նեղացա՞ծ է:
– Ես չգիտեմ, այսինքն` իր ասելով մենք ի՞նչ պետք է անեինք, երբ արձակուրդում էինք: Նստաշրջանը նոր է սկսվում, ախր, մենք արձակուրդից հետո չենք էլ աշխատել:

ԻՆՉ ԷՐ ԳՐՈՒՄ «ԻՐԱՎՈՒՆՔԸ» 1 ՏԱՐԻ ԱՌԱՋ

Չցանկանալով այս թեմայով շարունակել զրույցը` փորձեցինք ճշտել նաեւ Վահան Կարապետյանի` որպես գործարար պատգամավորի կարծիքը` Հայաստան-ԵԱՏՄ համագործակցության վերաբերյալ.
– Մենք այս համագործակցությունից ավելին էինք ակնկալում, բայց դեռ ամեն ինչ առջեւում է: Պարզապես ԵԱՏՄ անդամ դառնալով` մենք ե՛ւ հեծանիվ ենք քշում, ե՛ւ հեծանիվ քշել ենք սովորում: Շատ լուրջ պոտենցիալ ունենք, որը կարող ենք օգտագործել:
ԶՎԱՐԹ ԽԱՉԱՏՐՅԱՆ

Հակոբ Հակոբյանը «սպառնում է» ծիծաղելի մուլտիկներ նկարել «Ծառուկյան» դաշինքի պատգամավորների մասին

08.09.2017 ՕՐՎԱ ՊԱՏԿԵՐ ՔԱՂԱՔԱԿԱՆ ԹԵՄԱ

Հակոբ Հակոբյանը «սպառնում է» ծիծաղելի մուլտիկներ նկարել «Ծառուկյան» դաշինքի պատգամավորների մասին

Գործարար ՀԱԿՈԲ ՀԱԿՈԲՅԱՆԸ` Ճոյտը, որը խորհրդարանական ընտրություններին առաջադրվել էր «Ծառուկյան» դաշինքից` որպես պատգամավորի թեկնածու, բայց այդպես էլ Ազգային ժողով չանցավ, որոշել է վերահսկողություն իրականացնել իր թիմակից պատգամավորների նկատմամբ: Քննադատելով «Ծառուկյան» դաշինքի պատգամավորներին` «Իրավունքի» հետ զրույցում նա մասնավորապես շեշտել էր. «Մենք ունենք 15 կետերից բաղկացած ծրագրեր, որոնցով հանդես ենք եկել ժողովրդի առաջ, որին հայ բնակչությունը հավանության է արժանացրել: Այս ամենից հետո, կարծես թե, մեր ծրագիրը մոռացության է մատնվել: Տեսնում եմ, որ այս մասին դաշինքի պատգամավորները չեն խոսում Ազգային ժողովում, հարցազրույցներում, այնպիսի վայրերում, որտեղ ծրագիրը կդառնար քննարկման առարկա»: Սակայն, այսօր պարզվում է` Հ. Հակոբյանը որոշել է քննադատությունից անցնել գործուն քայլերի, հեռուստատեսությամբ տված իր վերջին հարցազրույցում նա զգուշացրել է. «Թույլ չենք տալու, որ այդ մարդիկ, պարզապես, գան Ազգային ժողով, աշխատավարձ ստանան, օր անցկացնեն կամ իրենց հարցազրույցներում փորձեն քծնել իշխանություններին: Շատ խիստ ենք պատժելու եւ ժողովրդին մասնակից ենք դարձնելու այդ պրոցեսներին: Ընդհուպ որոշել եմ, որ մենք մուլտիկներ պետք է նկարենք էն մարդկանց մասին, որոնք կշեղվեն իրենց ծրագրերից»: Ընդ որում` Հ. Հակոբյանը չի պատրաստվում խնայել թիմակից պատգամավորներին. «Այո՛, շատ ծիծաղելի մուլտիկներ կնկարենք, մի քանի հատն արդեն պատրաստ են, կարծես, ստացվել է: Թող շատ մարդիկ տեսնեն, թե ինչ է իրականում կատարվում»:

ԻՆՉ ԷՐ ԳՐՈՒՄ «ԻՐԱՎՈՒՆՔԸ» 1 ՏԱՐԻ ԱՌԱՋ

ՀՐԱՆՏ ՍԱՐԱՖՅԱՆ

 

КОМСОМОЛЬСКАЯ ПРАВДА