ԿԱՐՃ ԼՈՒՐԵՐ

«Մեր տնտեսությունը պետք է ազատվի օլիգոպոլ նկրտումներից»

24.01.2018 22:00 ՕՐՎԱ ՊԱՏԿԵՐ ՔԱՂԱՔԱԿԱՆ ԹԵՄԱ
«Մեր տնտեսությունը պետք է ազատվի օլիգոպոլ նկրտումներից»

«Ազդակ» ակումբում տեղի ունեցավ կլոր սեղան-քննարկում` «Գնաճի օբյեկտիվ եւ սուբյեկտիվ պատճառներն ու այն մեղմելու հնարավոր տարբերակները» թեմայով, որին մասնակցում էին ԱԺ պատգամավորներ ՀԱՅԿ ԲԱԲՈՒԽԱՆՅԱՆԸ, ՎԱՐԴԱՆ ԲՈՍՏԱՆՋՅԱՆԸ եւ տնտեսագետ ԹԱԹՈՒԼ ՄԱՆԱՍԵՐՅԱՆԸ:

«Քաղպայմանագրում» քննարկում ապագա ԱԺ նախագահի եւ տեղակալների թեկնածությունների հարցը․ «Հրապարակ»

ՊԵՏՔ Է ՀՐԱԺԱՐՎԵԼ ՄԱՀ-Ի ԵՎ ՀԲ-Ի ՀԱՆՁՆԱՐԱՐԱԿԱՆՆԵՐԻՑ

Ըստ ԱԺ պատգամավոր, ՍԻՄ կուսակցության նախագահ ՀԱՅԿ ԲԱԲՈՒԽԱՆՅԱՆԻ` իրավիճակն իսկապես անհանգստացնող է. «Գնաճը այն երեւույթն է, որը մշտապես ուղեկցում է ցանկացած տնտեսական զարգացող երկրի: Բայց կարծում եմ` ինքնին այդ գնաճն այնքան սարսափելի չէր լինի, եթե մեր հասարակությունը չունենար շուրջ 50 տոկոս աղքատներ, ծայրահեղ աղքատներ կամ մարդիկ, որոնք գտնվում են ոչ լրիվ բավարարվածության մեջ: Եթե հասարակությունն ունենար ավելի ցածր աղքատության եւ գործազրկության շեմ, բնականաբար, այդ գնաճն այդքան ցավալի չէր լինի եւ այդքան ազդեցություն չէր ունենա մեր հասարակության վրա:

Այստեղ պետք է հասկանանք, թե որտեղից է գալիս խնդիրը: Մեր տնտեսությունը կառուցված է Միջազգային արժութային հիմնադրամի` ՄԱՀ-ի եւ Համաշխարհային բանկի, մեղմ ասած, խորհուրդների, իսկ ավելի ճիշտ` հանձնարարականների հիման վրա: Հետեւաբար, ըստ իս, պետք է հրաժարվենք այդ հանձնարարականներից եւ փոփոխություն կատարենք մեր տնտեսական քաղաքականության մեջ»:

ԱԺ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի նախագահ, «Ծառուկյան» խմբակցության պատգամավոր ՎԱՐԴԱՆ ԲՈՍՏԱՆՋՅԱՆՆ այս հարցում համաձայնեց Հ. Բաբուխանյանի հետ` մասնավորապես նշելով հետեւյալը. «Ունենալով տարբեր հնարավորություններ` ժամանակին հետեւողական կերպով չեն օգտագործվել երկրի առավելություններն ու պոտենցիալը, դրա համար էլ հայտնվել ենք մի իրավիճակում, որտեղ ընդհանուր առմամբ` բնակչության, քաղաքացիների դժգոհությունը պետք է հասկանալ: Մենք, գտնվելով աշխարհաքաղաքական ոչ միարժեք տեղամասում, բազմաթիվ զարգացումների հորձանուտում, անկախ այն հանգամանքից, որ ունենք ազդեցություն այդ ամենի վրա, թե` ոչ, բոլոր պարագաներում ստացվում են օբյեկտիվ դժվարություններ: Սակայն օբյեկտիվ դժվարությունների մեջ են նետվում մոտեցումներ, գնահատականներ, թե միջազգային շուկաները, ֆինանսական ռեսուրսների սղությունը եւ այլն են բերել նման իրավիճակի: Բայց, այդուհանդերձ, պնդում եմ, որ մենք չենք օգտագործել մեր հնարավորությունները, մասնավորապես` քաղաքական առումով»:

Վարդան Օսկանյանին արգելել են մեկնել Հայաստանից. «Ժամանակ»

Եվրասիական փորձագիտական ակումբի անդամ, տնտեսագիտության դոկտոր, պրոֆեսոր, «Այլընտրանք» հետազոտական կենտրոնի հիմնադիր ԹԱԹՈՒԼ ՄԱՆԱՍԵՐՅԱՆՆ էլ նշեց. «Չմոռանանք, որ Հայաստանում կան աշխատող աղքատներ, որոնք, նվազագույն աշխատավարձ ստանալով, ի վիճակի չեն հոգալ գոնե միայն սննդի կարիքները, մինչդեռ սպառողական զամբյուղը տարբեր է, իր մեջ պարունակում է նաեւ կոմունալ ծախսերը եւ այլն: Իսկ ռեսուրսները բնավ սպառված չեն: Սոցիալական արդարության խնդիրն է շատերին ցավ պատճառում, որ ինչու, օրինակ, իրենք ի վիճակի չեն իրենց արդար աշխատանքով հոգալ իրենց կարիքները: Պետք է  կենսապահովման նվազագույն զամբյուղի մասին թվերը հրապարակային լինեն, եւ մեր երկրում պետք է արմատավորվի հաշվետվողականության ու պատասխանատվության ինստիտուտները»:

«ՏՆՏԵՍՈՒԹՅՈՒՆԻՑ ՊԵՏՔ Է ԴՈՒՐՍ ՄՂՎԵՆ ԿՐԻՄԻՆԱԼ ՀԱՐԱԲԵՐՈՒԹՅՈՒՆՆԵՐԸ»

ՀՀ նախագահի մոտ տեղի ունեցած խորհրդակցությունից հետո` ընդամենը ժամերի ընթացքում պարզվեց, որ մի շարք ապրանքների գներ նվազել են: Այս դեպքում,  ինչպե՞ս պետք է պայքարել տեղական գերշահույթ հետապնդողների դեմ, Հ. Բաբուխանյանն ասաց. «Նախեւառաջ մեր տնտեսությունը պետք է ազատվի մի շարք  օլիգոպոլ նկրտումներից: Տնտեսությունից պետք է դուրս մղվեն նաեւ ցանկացած տիպի կրիմինալ հարաբերությունները, որոնք, ցավոք, այս կամ այն ձեւով դեռեւս այդտեղ ներգործություն ունենում են: Այսինքն` մենք պետք է կարողանանք տնտեսությունը դնել զուտ տնտեսական զարգացման եւ պլանավորման սկզբունքների վրա: Ինչ վերաբերում է տարբեր տեսակի գերշահույթներին, ապա դրա համար գոյություն ունի այն հանձնաժողովը, որը պետք է ժամանակին աշխատեր եւ չսպասեր, որ ՀՀ նախագահը կանչեր, հանձնարարական տար, նոր գնար աշխատեր եւ գներն իջեցվեին: Այսինքն` Տնտեսական մրցակցության հանձնաժողովը չկատարեց իր վրա դրված պարտականությունները, ինչից պետք է որոշակի հետեւություններ անել»:

Անդրադառնալով վերոնշյալ հարցին` Վ. Բոստանջյանը նկատեց. «ՀՀ նախագահն էլ ասաց, որ սա, կարծես, տնտեսվարող սուբյեկտների ագահության նշանն է: Հասկանալի է, որ չկանոնակարգվածության պայմաններում յուրաքանչյուր ոք շուտ կամ ուշ, բարձր կամ ցածր կարող է գնաճային ռեժիմներ առաջարկել, որը, բնակաբար, տվյալ երկրի համար դառնում է խոցելի: Դրա համար ամեն պարագայում պետք է ունենալ ծրագիր, պետք է իմանալ ինչի ենք ձգտում: Մասնավորապես` կարիք կա արդյունաբերական զարգացման, որը մենք կենտրոնացված կառավարման տարիների ընթացքում ունեցել ենք: Ո՞ւր է մեր արտադրությունը, մեր արտադրական պոտենցիալ հնարավորությունները»:

ԲՀԿ-ի հիմքերը կսասանվե՞ն

Վ. Բոստանջյանի գնահատմամբ` ցանկացած  երկրի հաջողությունն առաջին հերթին պայմանավորված է կառավարման համակարգով` նախ պետական եւ երկրորդ նոր կարող է ածանցյալ դառնալ մասնավորի շահագրգռվածությունը` այն էլ ազատ մրցակցության պայմաններում:

«ԵՏՄ ԱՆԴԱՄ ԵՐԿՐՆԵՐԸ ԵՐԲԵՄՆ ՄՈՌԱՆՈՒՄ ԵՆ, ՈՐ ՄԵՆՔ ԷԼ ԵՆՔ ԳՏՆՎՈՒՄ ԱՅՆՏԵՂ»

Եզրափակելով թեման` ՍԻՄ կուսակցության նախագահը շեշտեց, որ պետք է վերադառնալ նրան, որ նվազագույն աշխատավարձը չհարկվի` հիշեցնելով, որ այդ հարկումն այնքան չնչին է, որ պետական մակարդակում խնդիր չի լուծում, սակայն խնդիր է լուծում այդ նվազագույն աշխատավարձ ստացողների համար. «Միեւնույն ժամանակ, մեկ այլ խնդրի վրա էի ուզում ուշադրություն դարձնեինք` որոշ քաղաքականացված շրջանակներ անազնվորեն փորձում են այս գնաճը կապել ԵԱՏՄ-ի մեր անդամակցության հետ, քանի որ շուկայի որոշակի պաշտպանության խնդիրներ դրվեցին: Պետք է ասեմ, որ սա զուտ քաղաքականացված մոտեցում է. ԵԱՏՄ-ի շրջանակում շուկայի պաշտպանությունը, որն ընդհանուր ԵԱՏՄ-ի քաղաքականությունն է, կարծում եմ` կարեւոր հանգամանք է ընդհանրապես տնտեսության զարգացման համար: Եվ եթե դրա հաշվին 0,2 կամ 0,1 տոկոս որոշ տեղերում եղան գնային աճեր, դրան զուգահեռ պետք է նշել, թե ինչ տնտեսական օգուտներ ունեցանք ԵԱՏՄ-ից` սկսած նրանից, որ մեր արտահանումը գերազանցեց 2 միլիարդ դոլարի շեմը, որն առաջին անգամ էր, եւ բազմաթիվ անգամներ ավելացավ մեր պատրաստի ապրանքների արտահանումը եւ այլն»:

Համաձայնելով Հ. Բաբուխանյանի հետ` Վ. Բոստանջյանն էլ հավելեց, որ Եվրասիական տնտեսական միության անդամ երկրները երբեմն մոռանում են, որ մենք էլ ենք գտնվում այնտեղ. «Քաղաքականացնելու փոխարեն, պետք է գնալ եւ աշխատել, մինչդեռ պատճառաբանություններ են փնտրում, թե իբր մենք խոշոր առումով ուժեղ պետք է զարգանայինք, բայց հանգրվանեցինք ԵՏՄ-ում, կորավ մեր զարգացումը: Եվրամիությանն իհարկե ողջունում ենք, բայց բոլոր դեպքերում, ԵՄ-ն հուզված չէ` մեզ նման գործընկեր տեսնելու: Եվ որտե՞ղ է գրված, որ նրանք պետք է իրենց ունեցվածքը մեզ տան ու ասեն` գնացեք, զարգացեք, ապրեք: Ցանկացած զարգացում, խոշոր առումով, ԵԱՏՄ-ում կլինի, թե ԵՄ-ում, պետք է լինի աշխատելով: Վերջապես պետք է ձերբազատվենք այդ հոգեբանությունից, որ հայացքներս ձգում ենք աջ ու ձախ` մտածելով, թե ում հաշվին կարելի է ապրել»:

«Կուսակցությունը դեռ վերջնական որոշում չունի, եւ պարզ է, թե ինչու...»

Իսկ վերջում Թ. Մանասերյանը զգուշացրեց. «Ակնհայտ որոշակի աղբյուրներից ֆինանսավորվողների համար պարարտ հող է ստեղծվում` թունավորելու առանց այն էլ ծանր մթնոլորտը, որտեղ մենք ուզում ենք առողջացման միտում բերել բոլորս` անկախ մեր քաղաքական հայացքներից: Սա ամենավտանգավորն է, եւ պետք է թույլ չտալ, որպեսզի դժվարին պայմանները, որոնք ունեն ե՛ւ օբյեկտիվ, ե՛ւ սուբյեկտիվ իրենց հիմքերը, հանկարծ մեզ շեղեն եւ տանեն դեպի սրացում: Սա ուղղակի անթույլատրելի է: Կարծում եմ` բոլորը լուծելի հարցեր են, ու ամենակարեւորը` պետք չէ խուճապի մատնվել»:

ՀՐԱՆՏ ՍԱՐԱՖՅԱՆ

 

КОМСОМОЛЬСКАЯ ПРАВДА